Tura, Rymphang 23
U MDC ka Tura bad Vice-President ka BJP, u Bernard Marak u la pynpaw ka jingsngewkhia halor ka jingpynslem ban siew ïa ka baibam sha ki samla pule (ka Jylla) da kaba ñiew ïa kane kum ka jingshet kylla ïa ki hok jong ki samla pule ‘riewlum jong ka Jylla.
Ha ka kyrwoh mynta ka janmiet, u Marak u la pynpaw ba u la wad jingtip na ka tnad Tribal Affairs ka Sorkar Pdeng halor kaei kaba jia bad la ïathuh ba ïa ka bhah jong ka Jylla kaba 10% ym pat shym la leh eiei, ha kawei ka liang kaba pynlong ïa ka jingpynslem ban pyllait ïa ki baibam.
“Ka jingbym ai ïa ka baibam sha ki samla pule ka dei ka jingkyntait bad ka jingshet kylla ïa ki hok. Nga la wad bniah na ka Tribal Ministry halor ka jingpynslem jong ka jingsiew ïa ka baibam sha ki samla pule bad la pyntip ba ïa ka thup ba la phah da ka Jylla la dep ban pyllait da kaba buh hakhmat eh. Hynrei ïa ka 90% kaba ka Sorkar Pdeng ka siew, ym pat lah ban phah sha ka ‘account’ jong ki samla pule tad haduh ba ka Jylla kan da phah shuwa ïa bhah ba 10% (jong ka) na ka bynta ka jingsiew,” ong u Bernard.
U la kynnoh ba ka jingpynslem jong ka Jylla ban pyllait ïa ka thup kyrteng ki samla pule, kumjuh ka jingbym pynkhuid ïa ka 10% kaba dei ban siew da ka Jylla ka dei ka daw bah haba ïadei bad ka jingpynslem bad ka long ka bym lah ban map.
“Ka jingpynslem jong ka Jylla ka la wanrah ïa ka jingkulmar jingmut ha ka ban pynkhuid ïa ka baibam bad ka la pynduh noh ïa ka hok jong kiba bun ngut ki samla pule. Ka Jylla ka khate 4% ka khajna na ka jingsiew ‘mobile’ jong ki samla pule man u bnai. Kumno kane ka Sorkar kam lah ban pynkhuid ïa ka 10% ha ka por kaba biang…ka long ka jingkylli kaba khraw”, la kylli u MDC.
U Marak u la kyrpad ïa ka Sorkar Jylla, ïa u Myntri Rangbah bad kumjuh ïa u Myntri ka tnad pule-puthi ban shimkhia halor ka jingeh jong ki samla pule naba bun na ki, ki wan na ki longïing ba duna ka ïoh ka kot.
“Lada ka pule-puthi ka dei ka mat ba hakhmat eh kumba la kular ha ka por ilekshon, kumjuh ka dei ban long ïa ka bha ka miat jong ki samla pule,” u la pynsngew.
