Shillong, Rymphang 23
Ka Myntri Rangbah ka Delhi, ka Rekha Gupta ha ka Sngi U Blei, ka la ong ba ka Sorkar AAP kaba la leit noh, ka la dep ban pynthylli ïa ka pla tyngka u paidbah, hynrei ka BJP ha ka jingsynshar jong ka, kan dang pyntreikam ïa ka skhim kaba T.2,500 shibnai na ka bynta ki kynthei.
Ha shwa ka jingthep vote sha ka ïingdorbar thawaiñ ka Delhi, ka Bharatiya Janata Party (BJP) ka la kular ban ai jingïarap mar T.2,500 man u bnai ïa ki kynthei na ki “longïing kiba duk” hapoh ka ‘Mahila Samriddhi Yojana’ bad T.21,000 na ka bynta ki kynthei armet ha ka jingpynbna mat kular ilekshon Delhi jong ka BJP.
“Ka jinglong jingman kaba la iehnoh da ka Sorkar barim ka long kumta ba haba ngi bishar bniah ïa ka jinglong jingman jong ka pisa tyngka bad ki heh Sorkar, ka pla tyngka paidbah ka paw ba ka thylli pura. Ka Mahila Samriddhi Yojana ka dei kaba man ka por na ka bynta ki paidbah nong Delhi, ka jingpyrshang kaba ïai bteng na ka bynta ki para kynthei jong ngi, bad ngin sa wanrah ïa ka hapdeng ki paidbah ryngkat ki jingpynbit pynbiang ba janai,” ong ka Rekha Gupta haba kren ha ka jingïalang bad ki lad pathai khubor.
Ka la ong ruh ba baroh ki MLA kin sa bam smai ha ka jingshong dorbar ba nyngkong jong ka Sorkar Delhi. Yn jied ïa u Lamphang bad Symbud Lamphang, katba ïa u nongpynïaid ïa ka dorbar ne u pro tem speaker yn pynsmai da u Lieutenant Governor ha ka Lah Sngi U Blei.
Kham ha shwa, ka Myntri Rangbah barim ka Delhi bad nongïalam ka AAP ka Atishi ka la thoh sha ka Myntri Rangbah ka Rekha Gupta, da kaba kyrpad ban ïakynduh ïa ka kynhun ki MLA jong ka AAP ha ka 23 tarik u Rymphang ban ïakren halor ka jingpyntreikam ïa ka skhim T.2,500 shibnai na ka bynta ki kynthei, ka jingkular kaba la ai da u Myntri Rangbahduh ka ri u Narendra Modi ha ka por jong ka jingïalap ilekshon.
Ka Atishi ka la kdew ruh ba ïa ka skhim ba la kular ym pat shym la mynjur wat la ka jingïalang jong ka kynhun Myntri kaba nyngkong ka la long ha ka 20 tarik u Rymphang. Shuh shuh ka la ong, “Ki kynthei jong ka Delhi ki shaniah ha ka jingkular jong u Modi, bad mynta ki sngew ba ki la shah thok.”
