Shillong, Rymphang 23
Katba ki paidbah ki dang ap ïa ka jingñiew vote na ka bynta ban tip ïa ki nongjop, ka jingkylli kaba hakhmat eh ka long, kaei ka seng ban ïoh bun eh ki MDC ynda la dep lut ka jingñiew vote?
Ki paidbah ki la ïakren bad buh jingkylli ruh, kaei ka seng ka ban ïalam ïa ka Executive Committee bathymmai bad kata ka seng kan thaw EC lang bad kino ki seng?
Ki nongïalam ka NPP bad VPP ki la kob lypa ba hadien ka jingñiew vote kin ïalam ïa ka Executive Committee bathymmai.
Katba na ki dak ki shin, ka pyni ban ym don kano-kano ka seng saiñ pyrthei kaba lah ban ïoh tang marwei hi haba ïadei bad ka jingbun paid ki MDC. Kumta, kan long kaba jwat bha, hato yn thaw biang ïa ka EC da ka NPP ne UDP kumba ki ïatreilang ne yn sakhi ïa ka jingshimti thymmai da ka VPP? Kane baroh kan sa shai tad ynda la dep ñiew lut ïa ki vote.
Ka khubor na ki nongpeit pyrman kiba la kulmar thlim ban kheiñ ne ïoh jingkheiñ kaba paka hadien ba u paidbah u la dep ban pyndep ïa ka jingthep vote, la pynpaw ba kan long kaba jwat na ka bynta ki seng saiñpyrthei bapher bapher ban ïoh ka jingbunpaid marwei hynrei lah ban sakhi biang ïa ka jingsynshar khleh khaw lang, kaba la ju ïaid baroh shi katta. Lada kine ki seng kin synshar la thikna ba ka VPP kan shong beit ha ka Liang Pyrshah namarba kam lah satia ban ïatreilang da lei lei ruh lane lada don ka jingkylla pat, ka lah ruh ban ïalam hi ïa ka bor synshar ha KHADC bad JHADC. Hynrei ka jingkylli ka long, katno tylli ki seng ki ban shong sha ka Liang Pyrshah?
Kaba kham pynkhuslai ïa kiwei pat ki seng saiñ pyrthei ka long ba ïoh ba ki MDC jong ki kin shahtan noh kha-ma-kha tang hadien ba la dep ñiew vote ban ïalong lang noh kawei bad kano-kano kawei pat ka seng saiñ pyrthei.
Namarkata, kaei ka seng ka ban ïoh thaw ïa ka Executive Committee bad kan thaw bad kino ki seng saiñ pyrthei ka dei ka jingkylli ka ban sa tip shai ynda la tip shai katno ngut ki MDC yn ïoh da ki seng saiñ pyrthei bapher bapher.
