Shillong, Rymphang 23
Ka tnad District Council Affairs (DCA) jong ka Sorkar Jylla ka la ong ba ka jingpynkhreh haba ïadei bad ka jingñiew ‘vote’ ha ka Lah Sngi U Blei ka la dep bad la dep ruh ban ai jinghikai sha ki ‘Counting Personnel’ ki ban ïadon bynta lang ha kane ka sngi.
“Ka jingpynkhreh ban ñiew ‘vote’ ka la dep bad la dep ruh ban ai jinghikai sha ki nongkheiñ ‘vote’ ne ‘Counting Personnel’ da ki DC bad ki RO bapher-bapher. Ïa ki jaka ñiew ‘vote’ ruh la dep ban pynithuh,” ong u Commissioner & Secretary ka tnad DCA, Bah C.V.D. Diengdoh.
U la ïathuh ruh ba na ka bynta ka KHADC, haba phai sha ka East Khasi Hills District, kin don lai tylli ki jaka ñiew ‘vote’.
“Na ka bynta ka Sohra Civil Sub-Division, ka jingñiew ‘vote’ kan long ha ophis SDO-Sohra, na ka bynta ka Pynursla Civil Sub-Division kan long ha ophis SDO ha Pynursla bad na ka bynta kiwei pat ki konstitwensi kiba hap hapoh EKH, kan long ha ISBT, Mawlai,” u la ong.
Ha kajuh ka por, u la ong ba kiwei pat ki jaka ñiew ‘vote’ kin dei ha ki jaka ñiew kiba la don lypa, ha ki DC ophis jong kiwei pat ki distrik.
Kum ban shu kdew hangne, ka jingwan poi jong ki nongthep ‘vote’ ha ka ilekshon ba la dep sha ka Khasi bad Jaiñtia Hills Autonomous District Council ka long 76.77% ha KHADC bad 85.58% ha JHADC.
Haba phai sha ka KHADC, ka konstitwensi kaba bun tam eh ki nongwan thep ‘vote’ ka dei ka 22-Nongspung-Sohïong konstitwensi – 86.09% katba kaba duna eh ka dei ka dei ka 16-Nongthymmai konstitwensi – 59.75%.
Ha kajuh ka por, ka jaka thep ‘vote’ kaba bun tam eh ki nongwan thep ‘vote’ ka dei ka 3-Maw-Ah kaba hap hapoh 9-Lyngkyrdem-Laitkroh konstitwensi – 96.99% katba kaba duna tam ka dei ka 59-Madanrting Thembasuk Rum A hapoh 16-Nongthymmai konstitwensi – 4.49%.
Haba phai pat sha ka JHADC, ka konstitwensi kaba bun tam eh ki nongwan thep ‘vote’ ka dei ka 26-Sumer konstitwensi – 91.46% katba kaba duna eh ka dei ka 18-Jowai-North konstitwensi – 75.28%.
Kumjuh, ka jaka thep ‘vote’ kaba bun tam eh ki nongwan thep ‘vote’ ka dei ka 13-Maskut kaba hap hapoh 6-Moodymmai-Nongkhroh konstitwensi – 99.52% katba kaba duna tam ka dei ka 14-Khaddum hapoh 27-Saipung-Nonghklieh konstitwensi – 51.34%.
Ha kajuh ka por, baroh ki don 158 ngut ki kyrtong kiba ïa aireng ha ka ilekshon sha ka KHADC, ba kynthup in 146 ngut ki shynrang bad 12 ngut ki kynthei.
Katba ki don 114 ngut ki kyrtong kiba ïakhun ha ka ilekshon sha ka JHADC ba kynthup ïa 107 ngut ki shynrang bad 7 ngut ki kynthei.
Ka KHADC ka don haduh 1669 tylli ki jaka thep ‘vote’ katba ka JHADC ka don 477 tylli ki jaka thep ‘vote’. Shuh shuh, ka jingdon ki nongthep ‘vote’ ha KHADC ka long 9,96,518 ngut katba ha JHADC pat ka long 3,12,300 ngut.
Ka konstitwensi kaba heh tam ha KHADC ka dei ka Mawlai ryngkat 49,841 ngut ki nongthep ‘vote’, katba kaba rit tam ka dei ka Jaïaw ryngkat 17,148 ngut ki nongthep ‘vote’.
Ha JHADC, kaba heh tam ka dei ka dei Muthlong-Sohkymphor ryngkat 14,167 ngut ki nongthep ‘vote’ katba kaba rit eh ka dei ka Sumer ryngkat 8.305 ngut ki nongthep ‘vote’.
