Ar tylli ki Ïingdorbar Thawaiñ kata jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) kin sa ïoh noh ïa ki dkhot bathymmai na ka bynta san snem 2025-2030. Napdeng 272 ngut kiba la ïakhun ha kane ka ilekshon 2025 tang 58 ngut ki ban shah jied ban long ki dkhot ka Ïingdorbar Thawaiñ na ka bynta san snem. Na ki 272 ngut, 158 ngut ki dei kiba la ïakhun ban shah jied sha ka ïingdorbar jong ka KHADC bad 114 ngut pat sha ka ïingdorbar JHADC.
Ha ka 24 tarik Rymphang, ka Rilum Khasi Jaiñtia baroh kawei kan tip ïa ki kyrteng jong 58 ngut ki MDC bathymmai jong ka Ïingdorbar Thawaiñ KHADC bad JHADC. Hadien ka jingthep ‘vote’ kaba la pyndep ha ka 21 tarik mynta u bnai, ngin sa tip ïa ka jop ka rem jong ki kyrtong kiba ngi la kyrshan ha ka sngi thep ‘vote’. Na ka liang ki bor pynïaid ilekshon ki la dep ban pyntip ïa ka jingwan poi jong ki nongthep vote kata haduh 76.77 persen ha KHADC bad 85.58 persen ha JHADC. Da shisha, ngin hap ban ai jingïaroh ïa ki nongpynïaid ïa ka ilekshon kiba la pynthikna ba kam shym la don ka huri-hura ne kano-kano ka jingïakynad, lait noh tang ka jingshah pynpra jong ki kor EVM ha Wapungskur bad Bataw, ha kaba ïa ka jingthep vote la rah noh sha ka 22 tarik, kaba la pynlong hapdeng ka jingpahara jur jong ki pulit.
Ngi kyrmen ba ka jubab ka ban mih lashai ka sngi kan long kaba neh baroh san snem khnang ba ngin lait na ki Executive Committee kiba neh tang katto-katne por. Ngi la mad bad ïohi ïa ki Executive Committee khamtam ha KHADC kiba la neh tang katto-katne snem bad bnai ha ka bor. Kane baroh ka wan jia namar ka jingbym don jong ka aiñ kyntiap seng kaba ailad laitluid ïa ki MDC ba kin ryngkang diengkper katba ki mon. Kumta mano napdeng ki kyrtong jong ka Voice of the People Party (VPP), National People’s Party (NPP), United Democratic Party (UDP), Khun Hynñiewtrep National Awakening Movement (KHNAM), Hill State People’s Democratic Party (HSPDP), Congress bad ki kyrtong shimet ki ban ïoh ïa u soh jong ka jingjop ynda la plie ïa ki kor EVM.
Lashai ngin sa tip shai kdar mano kita ki 58 ngut MDC ki ban mihkhmat sha ka ïingdorbar KHADC bad JHADC. Hynrei ngin hap ban ïa pdiang ïa ka rai jong kiba bun balang namar ka rukom ka long mynta ha ka jingïakhun ilekshon, ngi lah ban ïoh da kijuh ki MDC kiba la jop ha u snem 2019 lane ngi lah ban ïoh da ki bathymmai. Ka rai ka shong ha ki paidbah ba bun bad kata ka rai kan sa paw shai ynda la khyllie bad ñiew ïa ki ‘vote’ kiba don ha ki kor ‘Electronic Voting Machine’ (EVM) bad ki ‘Ballot Paper’. Ngi kyrmen ruh ba ka sngi ñiew ‘vote’ kan long kaba ïaid beit ïaid ryntih bad kaba lait na kino-kino ki huri-hura bad jingïakynad bad ba ki nongshong shnong kin pdiang ïa ka rai jong kiba bun ki nongthep ‘vote’.
Ki nongmihkhmat kiba kumno ba ki paidbah ki la dep rai bad ki ban sa tip shai mynta kin mih. Ngi donkam ïa ki briew kiba don ka jingnang jingtip bad jingshemphang bad kiba tip ban wanrah ïa ki aiñ bad ki mat treikam kiba lah ban kyntiew bad ïada ïa ka jaidbynriew. Kyrmen ba ka Ïingdorbar Thawaiñ sha KHADC bad JHADC kan ïoh ïa ki nongthaw aiñ, ym ki briew kiba pyrshang ban bsuh khlieh lyngba ka saiñ hima na ka bynta ban kamai spah bad ka jingmyntoi shimet lem bad ka ïing ka sem jong ki ne ban pynlong ruh tang kum u mawkyndon na ka bynta ka ilekshon MLA ka ban long ha u snem 2028.
