Jerusalem, Rymphang:
Ka Israel ka la pynkhreh ha ka sngi Saitjaiñ ban pdiang sa ia ki hynriew ngut ki nongshah rahbor jong ka na Gaza kum ka jingkylliang ïa ki spah ngut ki koidi bad ki nongshah set patok ka Palestine. Kane ka long hadien ba ki jingkynnoh halor ka jingwanphai biang jong ka met ba la tip bakla ha kane ka taiew ki la byrngem ban pynthut ïa ka jingïasuk kaba shipor.
Kitei hynriew ngut ki dei ki nong Israel kiba la shah rahbor khatduh bad dang im na ka kynhun jong 33 ngut kiba dei ban pyllait ha ka bynta ba nyngkong jong ka jingiateh sangeh iasiat kaba la ia mynjur ha u bnai ba la dep, la khmih lynti.
Saw ngut na ki nongshah rahbor kiba la shah kem ha ki lehnoh Hamas ha ka por ba ki hiar thma ia ka Israel ha ka 7 tarik u Risaw 2023, u Eliya Cohen 27 snem ka rta, u Tal Shoham 40 snem ka rta, u Omer Shem Tov 23 snem ka rta bad u Omer Wenkert 23 snem ka rta.
Kum ka jingsiew kylliang, la khmih lynti ba na ka liang jong ka Israel ruh kan pyllait noh ïa ki 602 ngut ki koidi jong ka Palestine kiba la shah set ha ki patok jong ka Israel hapdeng kine shi snem ba ka Israel ka la ïakhun thma bad ka Hamas.
Hynrei la ong ba ha ka janmiet jong ka Sngi Palei, ka Israel ka la kynnoh ba ka Hamas ka la pynkheiñ ïa ka jingiakut ban sangeh thma da kaba aiti ïa ka metïap bym lah ban ithuh ha ka jaka jong ki shyieng jong ka nongshah rahbor ka Shiri Bibas kaba dei ban pynphai biang ryngkat bad ki metïap jong ar ngut ki khun rit jong ka.
