Shillong Rymphang 23
Ka seng kaba dang shu mih shen ka A’chik State Peoples’ Front (ASPF) ka la pynlong ïa ka jingpynsngewthuh paidbah halor ka jingdonkam ban pynlong ïa ka Tura kum ka nongbah por tlang ne ka ‘Winter Capital’.
Ïa kane jingpynsngewthuh paidbah la pynlong ha Chisim A’pal kaba ha North Garo Hills District kaba la wan ban ïa don lang da ki nongïa-lam jong ka Garoland State Movement Commi-ttee (GSMC), kaba dei kawei na ki kynhun ba la lamkhmat ïa kane ka jingdawa la kham slem. Ha kane ka jingïalang la wan ban ïa shim bynta ruh da ki rangbah shnong na kylleng ki shnong jong ka North Garo Hills District, ki nongïalam niam bad ki paidbah.
Haba ai jingkren ha kane ka jingïalang na ka liang ka General Secre-tary ka ASPF ka Bernita Marak ka la ong ba kane ka jingdawa ban pynlong ïa ka Tura kum ka nongbah por tlang ka dei katkum ka jingïakren kaba tang da ka ktien ïa kaba la kular naduh ka por ki nongpynïoh ïa ka jylla.
“Khlem poi pyrkhat kane ka jingkular kam pat shym la urlong tad haduh kine ki sngi ba mynta, ka ASPF ha ryngkat ka GSMC dangshen ka la ai ïa ka dorkhas sha u Myntri Rangbah ka Jylla ha kaba ïa dei bad kane ka mat jingdawa” ka la ong.
Ka Marak ka la ong ruh ba lada pynlong ïa ka Tura kum ka nongbah por tlang kane kan wanrah ïa ka jinglong mar katjuh ha ka liang ki kam pynroi ha kine thaiñ. “Ka jingeh ha ka liang ka pisa-tyngka ban leit sha Shillong ka khanglad ïa kiba bun ki nongshong shnong ha ka ban ïoh ïa ki lad jingïarap ba kongsan, kane ka dei ka jingdonkam ba kyrkieh ïa ka nongbah por tlang khnang ban weng ïa kine ki jingeh” ka la ong.
Ka la pynshai ruh ba kane ka jingpynshai paidbah kam dei pyrshah ïa ka sorkar, hynrei ka dei ka jingkyrpad ban pynurlong ïa ka jingdawa ba la slem bha jong ka thaiñ Garo Hills kaba pynkynmaw ruh ïa ka jingthmu jong u Myntri Rangbah ba nyngkong ka jylla u Capt. Williamson A Sangma.
Ha kane ka jingïalang la shim ruh ïa ka rai ban leit pynsngewthuh ïa kane ka mat jingdawa ban pynlong ïa ka Tura kum ka nongbah por tlang sha baroh kawei ka Garo Hills.
