Shillong, Rymphang 23
Ka Meghalaya Sport Climbing and Mountaineering Association (MeSCMA) ka la pynthymmai ïa ki nongkitkam ha kaba ka Kong Malviancy Shabong ka la shah jied biang kum President bad u Bah Wallambok Lyngdoh kum General Secretary na ka bynta saw snem.
Ïa kane la pynlong ha ka Annual General Body Meeting kaba la long ha ka 22 tarik mynta u bnai ha kaba katei ka synjuk ka la pynkup burom ruh ïa ki saw ngut ki nongkiew lum kiba la khur takma ha ka North East Zone Championship 2025.
Kiwei ki dkhot kiba la shah jied ki kynthup ïa u Dr. W.W Phira kum u Vice-President, Asst Secretary Bah Teimiki Sungoh, Treasurer Bah David Laloo. Katba ki Executive Member ki kynthup Dr. W.W Phira a u Bah Fullmoon Lyngdoh, Pilaster Nongsiej, Kong Kayleigh Petra Nongkynrih, Bah Anthony Nongrum bad Bah Teiboklang Wanñiang.
Ha katei ka jingïalang la ïadon lang u Bah Pynbianglang Laloo, Asst Secretary ka Meghalaya State Olympic Association (MSOA) kum u nongpeit pyrman.
Lah ban kdew ba ka MeSCMA naduh ba la seng ïa ka ha u snem 2002 ka la kyntiew ïa ki kam ïalehkai kiew lum (adventure and Sport Climbing) ha kylleng ki District ha ka Jylla ryngkat ka jingïatreilang bad ki tnad sorkar bapher bapher kum ka Nehru Yuva Kendra Sangathan bad ka District Sports Office ryngkat ka jingkyrshan na ka tnat Sports and Youth Affairs ka Sorkar Jylla.
