Shillong, Rymphang 23
Ka Cricket Lovers bad ka Sohra Combine ki la lah ban pynthikna ban jam sha ka semi final ha ka 4th District League T20 Cricket Tournament 2024 ba la pynïaid da ka East Khasi Hills Cricket Association.
Ha kane ka jingïakhun quarter final kaba la long ha ka sngi Saitjaiñ ha madan Saitsohsen kaba ha Sohra, ka Cricket Lovers ka la pynliem noh ïa ka Cricket Smit da 54 run. Ka Cricket Smit kaba la jop ïa kynting pisa, ka la ailad ïa ka Cricket Lovers ba kan tied nyngkong ha kaba ka la ïoh 173 run bad shah pynhap 4 wiket ha ki 20 over. Kane ka la wan urlong lyngba ka jingïalehkai bha u Shavian Blah uba la khyrwit ïa ka shiteng spah kaba 69 run na ki 50 bol. Katba u Raymond Thabah u la shim 1 wiket ha ki 4 over na ka bynta ka Cricket Smit.
Haba wan beh ïa ka thong, ka Cricket Smit ka la ïoh tang 119 run bad shah pynhap 10 wiket ha ki 18.4 over. U Shankupar Kharbangar u la tied 36 run na ki 28 bol. Katba u Synrapsing Riahtam u la shim 3 wiket ha ki 3 over na ka bynta ka Cricket Lovers. Ïa ka nam Player of the Match la khur la ïohpdiang da u Md Muksodul Choudhury.
Haba phai sha kawei pat ka jingïakhun kaba ar, ka Sohra Combine ka la jop da 40 run ïa ka Laitkynsew CC. Ka Sohra Combines kaba la shimti ban tied nyngkong, ka la ïoh 123 run bad shah pynhap 5 wiket ha ki 18 over. U Pherson Diengdoh u la khyrwit ïa ka shiteng spah kaba 57 run na ki 44 bol. Katba u Jesper Malngiang u la shim 1 wiket ha ki 2 over na ka bynta ka Laitkynsew.
Haba wan beh ïa ka thong, ka Laitkynsew ka la ïoh tang 83 run ha ki 10 wiket ha ki 16.1 over. U Mortician Malngiang u la tied 20 run na ki 18 bol. Katba u Kevin Diengdoh u la shim 5 wiket ha ki 3 over na ka bynta ka Sohra Combine. Ïa ka nam Player of the Match la ïohpdiang da u Kevin Diengdoh.
