Imphal, Rymphang:
U Myntri barim jong ka Manipur u Yumnam Khemchand, u la pynbna ha kine ki khyndiat sngi ba la leit, ba shen yn sa khot ïa ka jingïalang jong ki MLA ka BJP, na ka bynta ban ïakren halor ka jingthaw ïa ka sorkar thymmai ha ka jylla.
U Khemchand, uba la bat mynshwa kum u Myntri ka tnad Municipal Administration, Housing, and Urban Development, u la kren ha ki nongthoh khubor hadien ka jingïakynduh bad u President ka BJP jong ka jylla, u A. Sharda.
U la pynshai hadien ka jingiehnohkam jong u N Biren Singh na ka kam Myntri Rangbah, ki MLA ka BJP kim pat ïakynduh ban ïakren ïa ki sienjam kiba hadien.
U la batai, “Ha shwa, haba ngi don u nongïalam jong ka ïingdorbar thaw aiñ, ngi ju ïalumlang man ka por ban ïakren lang ïa ki mat. Hynrei hadien ba u la iehnohkam, u President ka seng ha ka jylla jong ngi u la long u nongïalam, bad shen, ngin sa buh por ïa ka jingïalang jong ki MLA ka seng.”
Ka mat ba kongsan jong kane ka jingïalang ban wan kan long ban ïakren halor ka jingthaw ïa ka sorkar thymmai.
U Khemchand, u nongkynthoh tyngeh ïa u Biren Singh, u la kyntait ruh ïa ki khubor kiba mih na ka jingïapher kynhun hapdeng ki MLA ka BJP lane ka jinglah ban thaw ïa ka seng bathymmai ha ka thaiñ.
“Ngi ju ïohsngew kum kine ki jingkynnoh ha ki lad pathai khubor, hynrei nga lah ban pynthikna ba ki MLA ka BJP ki long kiba ïatylli. Ym don jingïapher hapdeng jong ngi, bad ka jingthaw ïa ka seng thaiñ kaba thymmai ka long kaba lait na ka jingkylli. Uno uno uba pyrkhat ïa kata u dei tang ka jingphohsniew sngi,” u la ong.
Ha kaba ïadei bad ka jingwan jong ki hynriew ngut ki MLA ka Kuki BJP sha katei ka jingïalang, u Khemchand u la kubur ba kam long kaba lah ban poi namar ka jingïakynad jaitbynriew kaba dang ïai bteng, kaba la pynlong ïa ka leit ka wan sha Imphal ban shem jingeh.
Haba kylli halor ka jingjied ïa u Myntri Rangbah bathymmai ynda la thaw ïa ka sorkar, u Khemchand u la iehnoh ïa ka rai ha ki nongïalam pdeng, da kaba ong, “Ai ba ki nongïalam pdeng kin rai ïa kata.”
La pyntreikam ïa ka President’s Rule ha Manipur ha ka 13 tarik, Rymphang bad la pynsangeh ïa ka dorbar jylla hadien ka jingiehnohkam jong u N Biren Singh.
U Singh, uba la ïalam ïa ka sorkar BJP la jan 21 bnai, u la hiar shuki noh hadien bun bnai jong ka jingïakynad hapdeng ki jaidbynriew kaba la shim ïa palat 250 ngut ki mynsiem briew, kaba la pynlong ïa ka jylla ban don ha ka jingkulmar ha ka saiñ pyrthei bad ka imlang-sahlang.
