Washington, Rymphang:
U President jong ka America, Donald Trump, ka Sngi Palei u la ong ba u Volodymyr Zelensky, President ka Ukraine bad u Vladimir Putin President ka Russia, kin hap ban iakynduh markhmat lada ki kwah ban pynkut noh ïa ka thma hapdeng jong kitei ar ri.
Namar la ong ba u Trump ha kane ka sien u la kren pyrshah pynban ïa u President ka Ukraine bad ong ba u long “u nongsynshar donbor,” hadien ba utei u President jong ka Ukraine u la ujor ba ka ri jong u kaba la shah hiar thma ha ka Russia ha u snem 2022, ka la shah iehnoh ha ka jingïakren hapdeng ki heh jong ka US bad Russia.
U Trump u la bynrap ba ka Ukraine kan kyrmen ba ha ka por kaba lyngkot bha ban wan kan soi ïa ka jingïateh kaba aiti ïa ka United States ïa ka jingïoh lad ban ïoh ïa ki marpoh khyndew jong ka Ukraine.
Namar la ong ba u Trump u kwah ba ka Ukraine kan ailad ïa ki kompeni jong ka US ban ïoh ïa ki marpoh khyndew kiba heh jong ka kum ka jingsiew kylliang na ka bynta ki phew klur tyngka ki jingïarap ba la pynpoi hapoh ka jingsynshar jong u Joe Biden, uba la wan ha shuwa jong u.
Ha ka jingsiew kylliang, ka Ukraine ka wad ïa ki jingpynthikna na ka ri America namar ba ka la soi noh ïa ki hok kiba kordor.
