Aizawl, Rymphang:
Ka sorkar Mizoram ka thmu ban pynmih ïa ka skhim sumar pang kaba thymmai kaba ai jingïarap Insurance haduh T.5 lak na ka bynta iwei i nongïoh myntoi, la pynbna u Myntri Rangbah ka jylla u Lalduhoma ha ka Sngi Thohdieng. Ïa kane ka skhim la khmih lynti ba yn pyntreikam noh ha u snem mang tyngka ban wan.
Haba kren ha ka por ba ai khublei halor ka jingkren jong u Lat ha ka dorbar mang tyngka kaba dang ïaid shakhmat, u Lalduhoma u la ong ba ka sorkar Zoram People’s Movement (ZPM) ha kaba sdang ka la wad ban pyntreikam ïa ka jingthmu jong ka koit ka khiah kaba la wanrah da ka sorkar barim jong ka Mizo National Front (MNF) hapoh ka jingsynshar jong u Myntri Rangbah barim u Zoramthanga.
Ka plan kaba kham mynshwa ka thmu ban ïoh ïa ka ram kaba T.1,000 klur na ka Asian Development Bank (ADB) ban pyntreikam ïa kane ka skhim. Hynrei wat hapdeng ka jingpyrshang, ym shym la lah ban ïoh ïa ka ram, kaba la pynlong ïa ka sorkar ban thaw ïa ka lad kaba pher da kaba pyndonkam ïa ka pisa jong ka jylla.
U Myntri Rangbah ka jylla u la pynpaw ba la pynlong ïa ka jingïakren bad ki nongïoh penshon, ki nongtrei sorkar, bad ki hospital shimet ban pynsuk ïa ka jingpyntreikam ïa ka skhim. “Ngi ngeit skhem ba ngi lah ban sdang ïa ka skhim sumar pang da kaba T.5 lak shisnem ka jingsumar pang na la ka jong ka jingdon jingem, khlem da shaniah ha ka ram jong ka ADB. Ngi kyrmen ban pyntreikam ïa ka ha u snem mang tyngka ba thymmai,” u la ong.
Hapoh kane ka skhim ba la tyrwa, ki nongïoh jingmyntoi kin ïoh ïa ka jingsumar khlem pisa haduh T.5 lak shisnem. Ka sorkar ka dang pyndep ïa ki jingïateh bad ki hospital shimet na ka bynta ban pyntreikam ïa kane ka skhim.
U Lalduhoma u la batai ïa ka rukom pynrung kyrteng, da kaba pynpaw ba ha kaba sdang yn plie haduh lai bnai, bud sa ka jingkhang shibnai. Hadien kata, yn plie biang ïa ka jingpynrung kyrteng sa shibnai ryngkat bad ka jingsiew kaba hadien. U la batai ba yn nym shah ban pynrung kyrteng bteng ban khanglad ïa ka jingpynrung kyrteng ha ka minit kaba khatduh da ki briew kiba wad jingïada tang hadien ba la shah sumar ha hospital, kaba lah ban wanrah ïa ka jingduhnong ha ka liang ka pisa tyngka ïa ka sorkar.
Mynta, ka jylla ka pynïaid ïa ka Mizoram State Health Care Scheme (MSHCS), kaba la wanrah da ka sorkar MNF ha u snem 2019, kaba ai jingïada ïa ka koit ka khiah haduh T. 2 lak shisnem. Ki heh sorkar ki la pynthikna ba ka MSHCS kan kut noh ha u bnai Lber.
Ha kajuh ka por, ka Ayushman Bharat – Pradhan Mantri Jan Arogya Yojana (AB-PMJAY) kaba dei ka skhim sorkar pdeng kaba ai Insurance Coverage haduh T.5 lak ha ka shisnem, ka dang ïai bteng ban pyntreikam ha Mizoram.
