Shillong, Rymphang 24
Ar tylli ki seng saiñpyrthei ba la rim ha ka ri (National Party), ka Indian National Congress (INC) bad ka Bharatiya Janata Party (BJP) ki la shah pynbam da u nod ‘0’ ha kane ka ilekshon MDC sha Khasi Hills Autonomous District Council (KHADC).
Ka seng Congress ka la pynïakhun haduh 28 ngut ki kyrtong ha KHADC lait noh ha Laban-Mawprem konstitwensi, katba ka seng BJP ka la pynïakhun 12 ngut ki kyrtong ha KHADC.
Ka konstitwensi ba ka seng Congress ka la shah rem bad pynkyndit ïa kiba bun ha kane ka ilekshon ka dei ha Mawkhar-Pynthorumkhrah ba aireng da u MDC bad CEM barim, Bah Pynshngaiñ N Syiem uba la ïoh tang 4442 ‘vote’ bad shah rem ha u kyrtong ka Voice of the People Party (VPP), Bah Strongpillar Kharjana da 2540 ‘vote’ uba la ïoh 6698 ‘vote’.
Kawei pat ka konstitwensi kaba ka Congress ka don jingkyrmen ka dei ka Malki-Laitumkhrah, hynrei ha kane ka konstitwensi ruh u kyrtong ka seng, Bah Manuel Badwar uba la ïoh 4142 ‘vote’ u la shah rem noh ha ka kyrtong jong ka seng VPP, Kong Deiti Majaw da 819 ‘vote’ kaba la ïoh haduh 4691 ‘vote’.
Ha ki ar tylli konstitwensi kiba ki kyrtong ka seng Congress ki la wan ba-ar ruh ki lah shah tam kput, ba kynthup ha Jirang ha kaba u kyrtong ka NPP uba dei u MLA, Bah Sosthenes Sohtun u la pynliem noh ïa u MDC, Bah Victor Ranee da 7832 ‘vote’, bad ha Sohryngkham u kyrtong ka VPP, Bah Bill Clinton Wankhar u la pynliem ïa u Bah Jonathan Syiem da 6752 ‘vote’, katba ha ki 24 tylli konstitwensi pat ki kyrtong ka seng Congress kim shym la lah ban khie-khlieh satia.
Haba phai pat sha Jaiñtia Hills, ka seng Congress ka la pynïeng haduh 20 ngut ki kyrtong, hynrei ka la ïoh jingjop tang ha ki 3 tylli konstitwensi, ba kynthup ha Amwi-Khliehtyrshi ha kaba u Bah Madonbai Rymbai u la jop ïa u kyrtong ka NPP, Bah Lakhon Dkhar da 988 ‘vote’, ha Saphai-Sahsniang u Bah Rikut Parein u la jop ïa u kyrtong ka NPP, Bah Remdor Kupar Lyngdoh da 289 ‘vote’, bad ha Saipung-Nongkhlieh u Lalwilliama Theite u la jop ïa u kyrtong ka NPP, Bah Arbor Hima Darnei da 299 ‘vote’.
Haba phai sha seng BJP kaba dei ka seng kaba synshar hapoh ka Sorkar Pdeng, ha KHADC ka la sei 12 ngut ki kyrtong bad ha JHADC ka la sei 7 ngut ki kyrtong. Hynrei kane ka seng kaba heh bad kaba synshar ha kiba bun ki Jylla ha ka ri kam shym la lah ban khie-khlieh ha kane ka ilekshon MDC.
