Jerusalem, Rymphang:
U Myntri Rangbahduh ka Israel- u Benjamin Netanyahu, u la ong ba ka Israel ka la pynkhreh ban leit hiar thma biang sha ka nongbah Gaza Strip bad u la kular ba ka Israel kan pyndep ia ki jingthmu baroh kumba ka la pynbna naduh ba sdang jong ka thma.
Namarkata, u la ong ba ka por ban sangeh thma shipor bad ban ia pyllait briew markylliang hapdeng ka Israel bad ka Hamas, ka la kut noh bad kumta ka Israel ka la pynkhreh ban sdang biang ia ka jingleit khynra bad ban ioh pynliem noh ia baroh ki dkhot bad ki nongialam jong ka kynhun lehnoh Hamas jong ka Palestine, kaba la synshar hi- ia ka nongbah Gaza da ki phew snem mynta.
U Netanyahu u la iathuh ruh ba ka Israel ka la ioh ban pynkhyllem ia bun ngut ki nongialam ba haklhieh duh jong ka Hamas hapdeng jong kine ki 1 snem tam ba ka Israel ka la ïakhun thma bad ka Hamas hapoh ka nongbah Gaza.
