Shillong, Rymphang 24
Ka Shillong Lajong FC ka dang don jingkyrmen ban don ha ka thup ïaknieh ïa ka nam lahduh ha ka Shillong Premier League 2024, hadien ba ka la lah ban pynliem noh ïa ka Nangkiew Irat da 4-0 kol ha ka Lah Sngi U Blei ha SSA Stadium kaba ha First Ground, Polo.
Katba ka Nongrim Hills ka la lah ban pynskhem ïalade ha kane ka lympung hadien ba ka la lah ban pynliem noh ïa ka Nongthymmai SC da 2-1 kol na ka bynta ban jam sha ka kyrdan ba hynñiew.
Katei ka jingjop ka SLFC ka la wan urlong lyngba u Deibormame Tongper (60′, 68′), Yohaan Benjamin (69′) bad u Riborlang L Lyngkhoi (75′) ha kaba kine baroh ki la wan hapoh 15 minit jong ka kylla miet.
Ha kawei pat ka jingïakhun, u Nickhil Lyngkhoi (37′) u la pynkhih jar nyngkong na ka bynta ka Nongrim Hills, hynrei u Pynshailang Kharduid (45’+2) u la lah ban pynïakhaid kylla na ka bynta ka Nongthymmai. Hynrei u Bankitboklang Nongrum u la lah ban pynurlong ïa ka jingjop na ka bynta ka Nongrim hadien ba u la ïoh ban thep shwa ban wai kata ha ka minit kaba 88.
Lyngba kane ka nam jop ka SLFC ka dang duna sa tang 2 point ïa ka Mawlai SC (38 point la 36 point), hynrei ka Mawlai ka dang sah ha kti sa kawei ka jingïakhun. Hynrei ka jingjop jong ka Nongrim Hills ka la pynlong pat ban kiew sha ka kyrdan ba hynñiew kata hadien ïa ka Sawmer SC, katba ka Nongthymmai ka dang ïai sah ha u laiñ jong ka jingma (relegation zone) kata ha ka kyrdan ba khyndai. Ka Nangkiew Irat ka dangsah ha ka kyrdan ba hynriew hadien ba ka la tam tang 1 point ïa ka Nongrim Hills.
Ka jingïalehkai ha ka sngi Ba-ar kan long hapdeng ka Langsning FC pyrshah ïa ka Laitkor SC ha ka por 11 baje mynstep, katba ha ka por 3 baje nohphai sngi ka Mawlai pyrshah ïa ka Rangdajied United FC. Lada ka Rangdajied ka mad ïa ka jingshah rem kan long ka jingduh ïa ka lad ban ïaknieh ïa ka nam lahduh ha kane ka lympung.
