Vatican City, Rymphang:
U Pope Francis uba dang ïakhun mynta ïa ka jingpang ‘Pneumonia’, u dang don hi hapdeng ka jingbym shngaiñ wat la ki nongsumar kiba sumar ia u ki la pyntip ba ka jinglong-jingman ha ka met jong u ka la kham bha khyndiat ban ia kaba long baroh shi katta.
Une u Pope, u la don 88 snem ka rta bad u la donkam ban ai snam hadien ba ki tor jong u ki la donkam ia ka jingïarap kaba kham jur, katkum ka khubor na ki nongsumar ha ka Sngi U Blei.
U Pope Francis, u la shah sumar ha ka Hospital Gemelli jong ka nongbah Rome naduh ba la pynkit ia u sha katei ka jaka sumar ha ka 14 tarik u Rymphang.
Ka ‘Double Pneumonia’ ka dei ka jingshitom kaba shyrkhei kaba lah ban pynmong bad pynjulor ia baroh ar tylli ki tor ha ka met jong u briew bad pynshem jingeh ban ring mynsiem.
U Francis, uba la long u Pope naduh u snem 2013, u la mad ia ki jingpang ba shitom ha kine ki ar snem ba la dep.
Ha ka Sngi U Blei, ka Vatican ka la ong ba katei ka jingai snam ka la pyni ia ka jingïarap bad ka la kham pynbit- pynbiang ia ka jinglong-jingman ha ka met jong utei u nongialam.
