Nongstoiñ, Rymphang 24
U kyrtong ka Voice of the People Party (VPP), Dr. Juristman Iawphniaw u la ïoh ka jingjop kaba heh na Nongstoiñ District Council Consti-tuency ha kane ka ilekshon sha KHADC ha kaba u la ïoh haduh 16928 vote da kaba tam 8718 ïa u kyrtong ka NPP, Bah Dresser Marngar uba la ïoh 8210 vote hadien ba la dep ñiew vote ha ka 24 tarik u Rymphang 2025 hapoh ka shlem trei kam jong u Deputy Commissioner ka West Khasi Hills.
Na Mawshynrut District Council Constituency u Bah Srally Rashir kyrtong ka HSPSP u la jop kput hadien ba u la ïoh haduh 14067 vote da kaba tam 3229 ïa u kyrtong ka NPP u Bah Gardinal Sohshang uba la ïoh 10838 vote, katba na Rambrai Jyrngam District Council Constituency u samla Lurshai Kharbani kyrtong shimet u ïoh ïa ka jingjop da kaba u la ïoh 9992 vote da kaba tam da 2154 vote ïa u kyrtong ka NPP Bah Kimfa Marbaniang uba la ïoh 7838 vote.
Haba kren sha ki lad pathai khubor, u Bah Srally Rashir uba la shah jied biang kum u MDC u la ai khublei ïa ki paidbah ka Mawshynrut kiba la pynjop ïa u ha kane ka kynti kaba mynta.
U Bah Srally u la ong ruh ba lyngba katei ka jingjop na ka liang jong u, un buddien ïa kiei kiba u la kren bad ki mat ïa kaba ka seng ka la buh.
U kyrtong shimet na ka Rambrai Jyrngam u samla Lurshai Kharbani u la pynpaw ka jingsngewnguh ïa U Blei nongbuh nongthaw ba wat hapdeng ki jingeh kaba u la mad hynrei da ka jingdon ryngkat jong U Blei ryngkat ka jingïarap jong ki paidbah jong ka konstitwensi lem bad u MLA ba u la poi sha ka thong.
“Nga dap da ka jingsngewsnguh shikadei ïa ki paidbah jong ka Rambrai Jyrngam kiba long kiba stad shisha ban jied namar ngim don spah don phew hynrei ngi jop da ka jingieit jong u paidbah,” u la ong.
U Dr Juristman Iawphniaw kyrtong ka VPP hadien ba u la jop kum u MDC u la ai khublei ïa baroh ki paidbah jong ka Nongstoiñ ba watla um shym la lah ban poi lut ha ki shnong ki thaw bad ki ïing ki sem ki jong ki hynrei ki la kyrshan da ka jingkyrmen bad na ka bynta ka lawei jong ki khun ki kti ki jong ki, ka lawei ka khyndew ka shyiap bad ka ri bad ka jaidbynriew.
Shuh shuh u la ong ruh ba u don ka jingbah khlieh kum u MDC jong ka Nongstoiñ na ka bynta u duk u suk na ka bynta ka khyndew ka shyiap bad ïa bun ki mat ba ka VPP ka la dep ba pynpaw.
