Nongpoh, Rymphang 24
Ka jingmih na ka ilekshon MDC ka la pynkyndit ïa kiba bun ki nongïalam bad paidbah ha kaba ka Voice of the Peoples Party (VPP) ka la ïoh ïa ka jingjop ha ki lai tylli konstitwensi ba kynthup ïa ka Umroi, Mawhati bad Umsning. Ka National Peoples’ Party (NPP) ka la ïoh jingjop ha ki ar tylli konstitwensi jong ka Nongpoh bad Jirang. Ar tylli na ki seng ba paw ha ka jylla bad kiba la ju jop teng ruh na Ri Bhoi kum ka United Democratic Party (UDP) bad ka Indian National Congress (INC) ki la jah kyrteng syndon mynta ka kynti khlem da jop wat tang shi seat ruh.
Kawei na ki jingmih kaba la pynkyndit ïa kiba bun balang, ka dei ka jingjop jong u Bah Kynjohlang Rangtong, kyrtong ka VPP na Mawhati konstitwensi. U Bah Kynjohlang u la ïoh haduh 11592 vote bad tam kumba 1053 vote pyrshah ïa u kyrtong ka NPP, Bah Joplin Sten uba la ïoh 10539 vote wat hadien ka jingïoh ïa ka jingkyrshan pura na u MDC barim ka Mawhati, Bah Charles Marngar uba dei ruh ha kajuh ka por u MLA ka NPP.
Sa kawei de ka jingmih kaba bun na ki paidbah kim lah ban mutdur, ka dei ka jingjop jong u Bah Banrikus Nongsteng, kyrtong VPP ha Umsning konstitwensi. U Bah Banrikus u la ïoh haduh 10530 vote bad tam tang 571 vote pyrshah ïa ka kyrtong ba wan ba ar, Kong Macdalyne Sawkmie Mawlong, kaba dei ruh ka MDC barim, kaba la ïoh 9960 vote katba u Bah Rocky A Marweiñ, kyrtong ka Congress uba la paw bha ha kine ki khyndiat sngi, u la ïoh tang 6821 vote.
Ha Umroi konstitwensi pat, u kyrtong ka VPP, Bah Isynei Hinge, u la ïoh ïa ka jingjop da kaba ïoh 9937 vote bad pynliem noh da 2008 vote ïa u Bah Rangkynsai Kharbuki, MDC barim ka NPP uba la ïoh 7929 vote. Katba u kyrtong shimet bad MLA barim ka Umroi konstitwensi, Bah George B Lyngdoh, u la ïoh tang 5011 vote.
Haba phai pat sha Jirang konstitwensi, u Bah Sosthenes Sohtun uba dei ruh u MLA ba mynta kane ka konstitwensi na ka NPP, u la ïoh ka jingjop da kaba pynliem noh ïa u Bah Victor Rani, MDC barim bad kyrtong ka Congress. U Bah Sosthenes u la tam kput da 7832 vote da kaba ïoh haduh 13822 vote pyrshah ïa u Bah Victor Rani uba la ïoh tang 5990 vote.
Ha Nongpoh konstitwensi, ka Kong Rona Khymdeit na ka NPP, kaba dei ruh tang ma ka napdeng ki kyrtong longkmie kaba la ïoh jingjop ha kane ka ilekshon MDC na Ri Bhoi, ka la lah ban pynliem noh ïa u Bah Balajied Rani, MDC barim na ka UDP da 3644 vote. Ka Kong Rona Khymdeit kaba la jop teng ruh kum ka MDC ha u snem 2014 na ka UDP bad shah rem noh ha u snem 2019, mynta ka kynti ka la ïoh 11306 vote katba u Bah Balajied Rani u la ïoh tang 7662 vote.
