Guwahati, Rymphang:
U MP ka Congress, u Gaurav Gogoi, u la kyntait tyngeh ïa ki jingkynnoh ba u don ka jingïadei bad ka kynhun syntiat jong ka Pakistan, ka ISI, da kaba ong ba ki long ki bym don nongrim bad shi bynta jong ka jingpyntip bakla kaba la thmu da ka Bharatiya
Haba jubab halor katei ka jingkynnoh, u Gogoi u la kynnoh ba ka seng synshar ka pyndonkam da ki jingthok bad ki jingpyntip bakla ban ïalam bakla ïa ki paidbah, da kaba ong, “Ka jingthok bad ka jingpynphriang ïa ki jingtip bakla ki dei ar tylli ki diengpyngkiang jong ka BJP. Ka dei ka kam jong ka BJP ban pynphriang ïa ki jinglamler bad ki jingtip kiba bakla. Ka kam jong ngi ka long ban pynthikna ba ka jingshisha kan poi sha ki paidbah.”
Kane ka jingïakynad ka la mih hapdeng ka jingïakynad ha ka saiñ hima-sima kaba nang jur ha shwa ka ilekshon ban wan, ha kaba u Gogoi u la pynskhem ba kum kine ki buit ki long ban pynphai ïa ka jingpyrkhat na ki mat ba shisha. Kitei ki jingkynnoh ki ïadei bad ka jingtohkit kaba dang ïaid shakhmat da ka tnat tohkit ïa ki kam runar jong ka kynhun Criminal Investigation Department (CID) ka Assam, kaba dang tohkit ïa ki jingkynnoh ba ki don ka jingïadei hapdeng u nong Pakistan u Ali Tauqeer Sheikh bad ka Elizabeth Gogoi, ka kurim jong u MP ka Congress.
U Myntri Rangbah ka Assam u Himanta Biswa Sarma u la pynbna ba la ujor mukotduma pyrshah ïa u Sheikh hapoh ki kyndon bapher bapher jong ka Indian Penal Code bad ka aiñ khanglad ïa ki kam beaiñ.
Ka jingtohkit ka long halor ka jingïadei jong u Sheikh bad ki seng kiba ïadei bad ka jingkylla ka suiñbneng kiba treikam ha India bad Pakistan, kumjuh ruh ïa ka jingïadei kaba la ïathuh ba u don bad ki kynhun sorkar jong ka Pakistan.
Katba ka BJP kam pat pynmih ïa ka jubab kaba shai halor ka jingkren jong u Gogoi, la khmih lynti ba ka jingïakren saiñ hima-sima kaba ïadei bad ki jingkynnoh kan nang jur katba nang jur ka aïom ilekshon.
