Shillong, Rymphang 24
Ki pulit ka East Khasi Hills ki la ïoh ban kem noh ïa 5 ngut ki nongtuh kali arshaka bad ïoh kurup ruh lai tylli ki arshaka.
Ha ka kyrwoh u Superintendent of Police ka East Khasi Hills Bah Vivek Syiem u ïathuh ba ki pulit ha ka jingbuddien ïa kawei ka kynhun ki nongtuh kali arshaka la katto-katne taïew, ki pulit Special Cell bad ka thanat Sohra ki la ïoh ban bat ïa arngut ki nongtuh arshaka hynnin ka miet ha Sohra Rim bad ïoh kurup ïa ka Suzuki Gixer Bike ML05-AD-4393 kaba tuh na Smit.
Kine ar ngut ki nongtuh ki kyrteng u Babu Marak ba 19 snem na Dalia Shella bad u Sunday N Sangma ba 30 snem na Samanda, East Garo Hills. Ïa kane ka arshaka la thmu ban die sha ki briew na Bangladesh.
U Bah Vivek u ïathuh ba kine ki nongtuh ki la shimti ïa kane ka arshaka ha Mawkdok na kawei pat ka kynhun Nongtuh, kiba donkti ban rong tuh ïa ki kali arshaka na kylleng ki jaka ka Nongbah Shillong.
U ïathuh ba ha ka jingbuddien bad jingkhynra, ki pulit Special Cell ki la ïoh ban kem biang sa 3 ngut ki nongtuh kiba donkti ha kiba bun ki kam tuh arshaka. Ïa kine ki briew la kem na kawei ka scooty ha ka thaiñ 7mer, Upper Shillong.
Kine lai ngut ki kyrteng u Barabor Namsaw ba 28 snem na Jirang, u Banroilang Iawrod ba 19 snem na Kynbahmalai, Phlangwanbroi, Mawsynram bad u Declin Warjri ba 20 snem na Nongmensong, Shillong.
Ha ka jingbteng ban talasi kali ha Sohra, ki pulit ki la ïoh bat biang sa ïa kawei ka arshaka ba shah tuh ha ka step Sngi U Blei na Mawïong Umjapung kaba don u nombor ML05-AA-3297. Ki nongtuh ki la pynïeng ïa kane ka arshaka shaneng jong ka jaka talasi ha Nongsawlia bad ki la phet krad na kane ka jaka haba ieh shadien ïa ka arshaka.
Ïa kine ki nongtuh la ïalam tian bishar hapoh ka mukotduma ka thanat Madanrting hapoh ka kyndon 303 (2) BNS.
