Ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) ki la ïoh ïa ki dkhot bathymmai ka Ïingdorbar Thawaiñ hadien ba la pynbna kum ki nongjop na 58 tylli ki konstitwensi ynda la dep lut ban ñiew ïa ki vote. Ka jingjied ha kane ka ilekshon MDC 2025, ka pyni bad ka la kren shai ba ki paidbah ki la thrang bad kwah dik-dik ïa ka jingkylla bad ha kaba ki la pynjop bun ïa ki kyrtong ka Voice of the People Party (VPP) kaba la ïakhun ha ka sien ba nyngkong eh ïa ka ilekshon MDC. Lada ka jingjied ïa ki briew kiba thymmai ka dei halor ka nongrim ba ki don ïa ki mat treikam kiba biang, ka long kaba dei eh ban pynrem noh ïa ki MDC barim, namar donkam ban ïohi ïa ka jingkylla ha ka rukom treikam ka ban pynmyntoi bad ai jingïada ïa ki paidbah. Mynta ba la ïoh ïa ki MDC kiba thymmai, donkam ban sdang thymmai ïa ka jingshakri ïa ki paidbah.
Ka jingai rai jong u paidbah ban pynjop haduh 17 tylli ki konstitwensi ïa ka VPP ha KHADC, ka la pynthikna ba ngin ïoh biang hadien arphew tylli ki snem ïa ka seng ka ban synshar marwei. Ka sien khatduh ba la sakhi ïa ka jingjop bun jong kawei ka seng, ka dei ha u snem 2004 ha kaba ka Congress marwei ka la jop haduh 19 ngut. Kumta ngi khmih lynti ba ka VPP kan sa lah ban pyndep bad pyntreikam hok ïa ki jingkular bad ki mat ïalap ilekshon hadien ba u paidbah u la ai ïa ka rai ba kan lah ban synshar marwei.
Ki paidbah nongthep ‘vote’ ha ka ilekshon MDC sha KHADC ki la ai da ki dur khmat bathymmai ban long ki simpah ki simsong ha ïingdorbar na ka Voice of the People Party (VPP). Ki paidbah ki la kyntait beit war ïa ka seng ba synshar, kata, ka National People’s Party (NPP), kaba la jop tang 4 ngut ha kane ka kynti. Ym tang ba ki la kyntait, hynrei ki paidbah ki la pynjop donburom ruh ïa ki kyrtong ka VPP.
Ka jingjop donburom jong ka VPP ka pyni shai ba kum ki MP ne ki MLA ne ki MDC kim lah ban kheiñ dewthala ïa ki paidbah ne ban shim sting ïa ka kam. Kim lah ban shu pynbiej beit man la ka san snem bad khmih lynti ba ki paidbah kin ngop beit man la ka san snem. Ka don ka por ïa kiei-kiei baroh. Bad ynda la kyan ka sur jong u paid knup u paid trap, u kup shiliang u sem shiliang, ka buh jingma ïa kito kiba sngew ba ki lah ban lehkai bad ki paidbah. Ngi lah ban ong ba kiba kham bun na ki paidbah ki dei kiba stad ban jied bad ki da bishar mano kiba trei bad mano ba shu heh tang ka tyngam.
Ngi tip baroh ba kane ka ilekshon MDC sha KHADC bad JHADC mynta ka kynti ka la long kaba shongshit tam na baroh ki ilekshon MDC kiba la leit noh. Ngim ju kynmaw ba ki paidbah kin long shitrhem ha ka ilekshon MDC kumba ki la long ha kane ka kynti. Lada ki paidbah ki ïai long husiar, peitngor bad kiba ai jingsneng ïa ki MP, MLA bad MDC kiba leh mon bad kiba ïaid lait na ki, ka jylla jong ngi kan kylla dur kan kylla dar ha ka synshar ka khadar. Kiwei ki nongmihkhmat paidbah ki dei ban shim kum ka jingsneng na kane ka ilekshon MDC kaba mynta.
Lada ngi kren shaphang ka pisa, kane ruh ka don la u jong u pud. Ka ju poi ka samoi ba ka pisa kam lah ban pynjop ne pynrem ïano-ïano lada kiba bun na ki nongthep ‘vote’ ki la dep ban raikut ïano ban jied. Ha kaba kut, kato ka pisa ba theh ban thied ‘vote’ ka shu kylla lehnohei.
Ka jingkyrmen na ki nongkyrshan ïa ki MDC bathymmai ka VPP ka long ba kin trei minot, kren da ka sur kaba jam, pyni da ki kam, bad ban don ha syndah jong ki paidbah ha kano-kano ka por. Ki paidbah ki la pyndep ïa la ka jong ka kamram ban jied ïa ki 17 ngut na ka bynta san snem, bad mynta ka shong sa ha ki, kumno kin treikam ha KHADC. Ki dei ban long shisha ki simpah ki simsong bad ki khraw pyrkhat ban ïakhun na ka bynta ki daw bah jong ka jaidbynriew. Ki ilekshon kin wan bad kin leit, bad ki paidbah kin sa bishar hi ïa kine ynda la dei ka aïom na ka bynta kawei pat ka jingïakhun.
Ngi khmih lynti ruh ba kum ki MDC kiba la shah jied thymmai jong ka VPP kum ki nongthaw aiñ kin wanrah ïa ki mat treikam (policy) kiba dei na ka bynta ka council bad ka jaidbynriew kumno ban wanrah ïa ki lad jingïada bad ban kyntiew ïa ka rukom im bad ka ïoh ka kot jong ki nongshong shnong.
