Shillong, Rymphang 24
Ka Liverpool ka la lah ban pynliem noh ïa ka Manchester City da 2-0 kol na ka bynta ban tam haduh 11 poiñ ïa ka Arsenal na ka bynta ban ïai bteng ban bat ïa ka kyrdan ba ha khlieh duh bad ka la don jingkyrmen ban rah ïa ka nam lahduh ha ka Premier League.
Hadien ba la plie ïa ka lad ban thep haduh 30 kol ha kane ka samoi ïalehkai bad ka jingïarap ruh na u Dominik Szoboszlai ban pynurlong ïa ka jingjop shwa ban wai ka por ïalehkai, u Mohamed Salah u la paw biang sa shisien kum u rangïalehkai ba kynsai jong ka Liverpool.
“Ka long kaba kyrpang. Khamtam haba phi don ha ka jingïakhun ban kynjoh sha ka thong na ka bynta ban rah ïa ka nam lahduh, ka long kaba phylla”, la ong u Salah hadien ba ka Liverpool ka la jop nyngkong ïa ka league ha Etihad ha ki shiphew snem.
“Nga bad ki rangïalehkai kiba la kham rangbah hapoh ka kynhun, ngi donkam sa kawei pat ka nam lahduh.”
Kane ka la long sa kawei pat ka jingshah rem kaba pyndiaw mynsiem ïa ka kynhun ïalehkai kaba la rah teng ïa ka nam lahduh ha England, kaba dang duna haduh 20 poiñ na ka kynhun kaba bat ïa ka kyrdan ba ha khlieh duh bad kane ka long tang hadien katto katne sngi ba ka la shah rem ha ka Real Madrid ha ka Champions League.
Hapoh ka jingïalam u Pep Guardiola, ka Liverpool ka ju shah rem ha ka jingïakhun pyrshah ïa katei ka kynhun ha kine ki snem ba la leit.
Hynrei ha kane ka samoi kaba nyngkong jong u Arne Slot kum u Manager, mynta ka long kumba kin lah ban pynpra ïa ka rekod jong ka Manchester United kaba la jop 20 tylli ki nam lahduh ha England tang hapoh khyndiat bnai.
