Shillong, Rymphang 24
Ka National People’s Party (NPP) kaba la shah knieh noh ïa ka bor synshar ha Khasi Hills Autonomous District Council (KHADC), ka la ai khublei bad pynpaw ba ka burom bad pdiang ïa ka rai jong ki paidbah ka Ri Khasi-Jaiñtia halor ka rai ba ki la ai ha kane ka ilekshon MDC kaba la kut noh ha ka Lah Sngi U Blei ka 24 tarik da ka jingpynbna ïa ki nongjop.
Haba kren ha ka Lah Sngi U Blei, u Nongai-ktien ka NPP, Bah Himalaya M Shangpliang u la ai khublei ïa ki paidbah nongjied sha ka Khasi Hills Autonomous District Council (KHA DC) bad Jaiñtia Hills Autonomous District Council (JHADC).
Ha kaba ïadei bad ka KHADC, u la ong ba ka NPP ka la pynïeng kyrtong ha ki 25 tylli konstitwensi bad ka la jop ha ki 4 tylli konstitwensi.
“Na ka liang ka seng ngi kwah ban ai khublei ïa baroh ki nongshong shnong baroh ki nongthep ‘vote’ namar ka jingkyrshan kaba ki la ai ïa ka seng jong ngi. Hooid, ngi sngewthuh ba ka rai jong ki paidbah ka long ka rai ba ngi dei ban pdiang bad ngi burom”, u la ong.
Ka NPP ha kane ka ilekshon ka la jop tang 4 ngut ki MDC; Kong Grace M Kharpuri na Nongshken, Bah Alvin K Sawkmie na Mawsynram, Kong Rona Khymdeit na Nongpoh bad Bah Sosthenes Sohtun na Jirang konstitwensi.
Ha kaba ïadei bad kine 4 ngut ki kyrtong ba jop na ka seng, u Bah Himalaya u la ong, “Ki MDC ka NPP kin shong ha ka Liang Pyrshah bad kin shakri ïa ki paidbah. Ka seng NPP ka im sngi ban shakri ïa ki paidbah bad kan ïai shakri ïa ki paidbah ha ki sngi bad ki snem ban wan”.
Haba kubur ba ïa ka executive committee ha KHADC yn sa shimti noh da kawei pat ka seng, une u Nongïalam ka NPP u la ong ba ka seng ka kitbok ïa ka seng ka ban shimti thymmai ïa u lakam synshar ha KHADC, ba kan trei bha bad trei minot ha ka ban shakri ïa ki paidbah.
“Na ka seng NPP ngi long ki ban kyrshan ïa ki kam bad ki mat kiba dei na ka bynta ka imlang-sahlang bad kumjuh na ka bynta ka roi ka par jong ki paidbah”‘ u la ong.
Ha kaba ïadei bad ka JHADC, u Bah Himalaya u la pynpaw ka jingsngewkmen ba ka seng ka la ïoh jingjop ha ki 13 tylli konstitwensi, ha kaba u la ong ba ki 13 ngut ki MDC ka NPP kin shimti ban pynïaid ïa ka executive committee da ka jingïatrei ryngkat bad kiwei ki seng kiba ïahap jingmut bad ka NPP.
