Shillong, Rymphang 24
Ka Kong Deiti Majaw kaba dei ka kyrtong jong ka Voice of the People Party (VPP) na Malki-Laitumkhrah konstitwensi ka la pynliem noh ïa u kyrtong ka National Peoples’ Party (NPP) bad uba dei ruh u MDC ka thaiñ, u Bah Fantin J Lakadong uba dei u kurim ka MLA ka Kong Ampareen Lyngdoh da kaba ïoh haduh 4867 vote hadien ka jingpynbna ïa ka resol MDC ba la ñiew ha Inter-State Bus Terminus (ISBT) ha Mawlai-Mawïong ha ka 24 tarik u Rymphang, 2025.
Ha ka jingïoh ïakren bad ka Kong Deiti hadien ba la dep ban pynbna ïa ka resol, ka la ong ba katei ka jingjop donburom jong ka ha kane ka ilekshon MDC ka dei ha ka sien banyngkong ha kaba ki paidbah ki la ai ïa ka jingshaniah jong ki ha ka kum ka kyrtong bad ha ka jingïalam jong ka seng.
“Ngi la leh ïa ka kam kaba dei, ngi la trei minot bad step bad miet haduh ba ngin da ïoh shisha ïa u soh ka jingjop”, ong ka Deiti.
Ka la ong ba lyngba ka jingjop jong ka ha kane ka ilekshon MDC, ka jingai khublei ka leit ruh sha u kpa jong ka, kata u Bah Bindo Lanong uba dei u nongïalam barim ka United Democratic Party (UDP) bad ruh u nongmihkhmat barim katei ka konstitwensi.
“Hangne ngi ïohi ruh ba ki paidbah ki shaniah ha i pa jong nga namar i pa i dei i briew iba khuid bad iba la dep ban trei na ka bynta ki paidbah. Nga lei nga dang shu mih hynrei ka dei ka seng kaba trei bad i pa jong nga kiba la noh synñiang ha kane ka jingjop jong nga mynta”, ong ka Kong Deiti.
Ka Kong Deiti ka la ong ba ki paidbah ha kane ka kynti kaba mynta ki la angnud ban ïohi noh ïa ki jingkylla namarba ka VPP ka kular ban wanrah noh ïa ka synshar-khadar kaba khuid bad suba bad ban ïakhun pyrshah ïa ka jingbamsap hapoh ka Jylla.
Kum ban shu kdew hangne, ka Kong Deiti ka la pynliem noh ïa u Bah Fantin J Lakadong uba la wan ha ka kyrdan ba lai da kaba ïoh tang 3529 vote, katba uba wan ba-ar pat u dei u Bah Manuel Badwar kyrtong ka Congress uba la ïoh 4039 vote.
