Shillong, Rymphang 24
Lai ngut ki nongïalam ba ha khmat jong ka Khasi Hills Autonomous District Council (KHADC), kita u Bah Pynïaid Sing Syiem uba long Chief Executive Members (CEM), Bah P.N Syiem kum Deputy CEM bad Bah Lamphrang Blah kum Chairman ki la shah pynliem noh ha ki kyrtong jong ka Voice of the People Party (VVP) ha kane ka ilekshon sha KHADC ba la pynlong ïa ka jingñiew vote ha ka Lah Sngi U Blei.
U Bah Winstone Tony Lyngdoh, kyrtong ka Voice of the People Party (VPP) na Nongthymmai konstitwensi u la ïoh 9868 vote bad pynliem noh ïa u Bah Pynïaid Sing Syiem, CEM barim ka KHADC uba la ïoh 6036 vote, katba u Bah Pynshngaiñ N Syiem, Deputy CEM bad kyrtong ka Indian National Congress (INC) uba la ïakhun na Mawkhar-Pynthorumkhrah konstitwensi u la shah pynliem noh ha u Bah Strong Pillar Kharjana uba dei kyrtong jong ka VPP uba la ïoh 6982 vote bad u Bah Lamphrang Blah, Chairman bad kyrtong ka NPP uba ïakhun na Mawphlang-Diengiei konstitwensi u la shah pynliem noh ha u Bah Lancaster Marbaniang uba la ïoh 12335 vote.
U Bah Pynïaid ha ka jingïalang kaba lyngkot ba la long ha ka ïing sah jong u, u la ong “Nga pynpaw ka jingsngewnguh ïa ki nongshong shnong jong ka Nongthymmai konstitwensi khamtam ïa ki hynriew hajar ngut kiba la ai ka jingkyrshan bad jingshaniah jong ki ïa nga bad kane ka pyni ruh ïa ka jingangnud jong ki briew ban ïoh ïa ka jingtreikam jong ngi,” u la ong.
U la ong ruh ba wat tang ha ka por kaba khim bad ba lyngkot bha kaba nga la ïoh ban rai ban wan ïakhun nangne napoh ka Nongthymmai konstitwensi hynrei ha kine ki ar bnai nga la ïoh ban ïakynduh ïa ki paidbah bad ki kynhun bapher-bapher kiba napoh kane ka konstitwensi.
Nalor kane, u la ong ruh ba kane ka jingshah rem jong u ha kane ka ilekshon ka dei kaei-kaei kaba baroh ki jia da ka jingtip jong U Blei ba najrong bad ngi hap ban pdiang ïa kata.
U la ai khublei ruh ïa baroh ki dorbar shong kiba hap hapoh ka Nongthymmai konstitwensi kumjuh ïa ka dorbar shnong Pohkseh kaba la ai ka jingïatreilang wat tang ha ka por ba lyngkot ba nga la ïoh ban pyntip sha ki.
Kum ban shu pynkynmaw, u Bah Pynïaid Sing Syiem u dei CEM ka KHADC bad MDC ka NPP uba la jop ar samoi na Sohryngkham konstitwensi hynrei mynta ka kynti u la ïakhun noh na Nongthymmai konstitwensi ha kaba u la shah rem noh.
Katba na ka liang u Bah P.N Syiem u la ong ba wat la na ka liang ka Congress ki la ai ka jingpynshai sha ki paidbah halor ka jingmih noh ka seng na ka jingïatreilang bad ka NPP hapoh EC ha KHADC bad kular ban ym ïatreilang shuh hynrei ki paidbah kim shym la ai ka jingkyrshan pynban ki don la ka jong ka rukom pyrkhat.
