Shillong, Rymphang 24
U Bah Thombor Shiwat uba la shah jied biang kum u MDC na Moodop-Umladang ha ka jingpynbna ïa ka resol na ka Jaiñtia Hills Autonomous District Council (JHADC) bad uba dei ruh u Chief Executive Members (CEM) barim jong ka JHADC un ïalam biang ïa ka Executive Committee, la pynbna da u Symbud Myntri Rangbah ka jylla uba dei ruh u General Secretary ka NPP, Bah Sniawbhalang Dhar.
Haba kren sha ki lad pathai khubor, u Bah Sniawbhalang Dhar u la pyntip ruh ba ka NPP mynta ka la don 14 ngut ki MDC hadien ba ka MDC shimet jong ka Rymbai-Khliehriat ka Kong Violet Lyngdoh ka la pynïasoh pura ïalade sha ka NPP.
U Bah Sniawbhalang u la ïathuh ba kane ka EC thymmai hapoh ka JHADC ha ka jingïalam ka NPP ki la don 18 ngut ki MDC lyngba ka jingwan ai jingkyrshan jong 3 ngut ki MDC na ka United Democratic Party (UDP) bad uwei u MDC shimet na Jowai-South, Bah Moonlight Pariat.
“Ngi la don ka jingïalang mynta ka janmiet bad baroh ki MDC bathymmai jong ka NPP ryngkat ki MDC ka UDP, ka MDC na Rymbai ka Kong Violet Lyngdoh bad u Bah Moonlight Pariat MDC na Jowai ban ai ka jingkyrshan ïa ka EC ha JHADC,” u la ong.
U la pyntip ruh ba ki para MDC ki la don ka jingsngewthuh jingmut ba kane ka EC ba mynta yn lamkhmat da ka NPP ryngkat ka jingïatreilang bad ka UDP bad u MDC shimet.
U la pynpaw ruh ka jingsngewnguh ïa ki paidbah jong ka Jaiñtia Hills District kiba dang ai ka jingshaniah ïa ka NPP.
