Shillong, Rymphang 25
Ka Donkin Cricket Club ka la pynliem noh ïa ka Sporting CC da 3 wiket na ka bynta ban ïoh jingjop ha ka Super Division Shillong Cricket League 2024-25 ba la pynïaid da ka Shillong Cricket Association ha ka Sngi Ba-ar.
Ha kane ka jingïakhun kaba ka long ha madan Polo, ka Donkin kaba la jop kynting pisa ka la ailad shwa ïa ka Sporting ba kan tied nyngkong ha kaba ka la la ïoh 166 run bad shah pynkhyllem 10 wiket ha ki 39.1 over. U Sachin Kumar u la tied 40 run na ki 58 bol bad u Indrajit u la ïoh 36 run na ki 67 bol. Katba u Terry Dkhar lem bad u Moksodul ki la shim mar 3 wiket na ka bynta ka Donkin.
Haba wan shimti ïa ka pali ba ar, ka Donkin ka la lah ban kynjoh sha ka thong da kaba ïoh 169 run bad shah pynkhyllem 7 wiket ha ki 44 over. U Rohit Rai u la tied 39 run na ki 78 bol bad u Pynkop Bonney u la ïoh 29 run na ki 34 bol. Katba u Sachin Kumar bad u Suraj Chettri ki la shim mar 2 wiket na ka bynta ka Donkin. Ïa ka nam ‘Player of the Match’ la ïohpdiang da u Maksodul uba la shim 3 wiket bad ïoh 18 run.
