Shillong, Rymphang 25
Ka Real Madrid ka la pynliem ïa ka Girona da 2-0 kol ha ka Sngi U Blei na ka bynta ban don ha ka kyrdan ba ha khlieh ryngkat bad ka Barcelona ha ka lympung La Liga.
Kane ka nam jop jong kane ka kynhun hapoh ka jingïalam u Carlo Ancelotti ka la wan urlong lyngba u Luka Modric lem bad u Vinicius Junior na ka bynta ban ïaryngkat mar 54 poiñ bad ka Barcelona kaba dang lamkhmat ha kane ka lympung.
Katei ka lahduh barim ka la don hapdeng ka jingeh ha ka jingïakhun ban ïaknieh ïa ka nam lahduh hadien ba ki kynhun ka liang pyrshah, kita ka Barcelona bad ka Atletico Madrid, kaba don mynta ha ka kyrdan kaba lai, baroh ar ki la jop ha ka Sngi Saitjaiñ.
Wat la ka Madrid ka la shah rem ha ki lai tylli ki jingïalehkai ba la dep jong ka league, hynrei ka la pyni ïa ka bor jong ka da kaba pynliem ïa ka Man City ha ka Champions League ha ka taïew ba la dep.
