Washington, Rymphang:
U President jong ka France, Emmanuel Macron, ha ka Sngi Nyngkong u la maham ba ka jingsuk ba la kular da ka US ia ka Ukraine, kam lah ban long tang lada ka Ukraine kan pyndem hi noh da lade hakhmat ka Russia. Namar u la ong ba ka jing-iakren hapdeng jong u bad u President ka US-Donald Trump, ka la wanrah ia ka jingseisoh kaba i don jingkyrmen ba kane ka kam kan nang ïaid shakhmat, wat la ka don ka jingsheptieng ioh kan mih ka jingiapher jingmut kaba jur.
Haba ïakynduh markhmat ha ka ïing White House ha ka jingdap lai snem jong ka jingwan hiar thma jong ka Russia, kine ki arngut ki nongïalam ki la ong ba ka don ka jingseisoh halor ka jingthmu ban phah ïa ki shipai pynïasuk sha Ukraine, wat la u Trump u la ban jur ba ka Europe ka dei ban kit ïa ka jingkit kaba khia.
Ka jingïakren jong ki, ka long ruh ha kane ka por ba u President ka Ukraine- Volodymyr Zelensky, u la khot ïa ka Russia ban iasuk noh hapoh jong une u snem bad ha kajuh ruh ka por, ki ri kiba long dkhot jong ka UN, ki kyrshan ïa ka rai kaba kyrshan ïa ka jinglong trai ri jong ka Ukraine.
Hynrei la ong ba dei ka America kaba la kylla ktien pynban ha ka jing-ialang jong ka UN, da kaba kyntait ban pynrem ia ka Russia bad da kaba ïasnohkti lang bad ka Russia bad ka North Korea bad wanrah ruh ïa ka jingsheptieng ioh ba u Trump un pdiang ïa ki jingkren jong ka Russia haba iadei bad ka thma.
U Macron u la ong ba u Trump u don ka daw kaba biang ban ïakren biang bad u President ka Russia- u Vladimir Putin hynrei u la ong ba ka long kaba kongsan ïa ka US ban tyrwa ïa ka jingkyrshanna ka bynta kino- kino ki kynhun kiba thmu ban wanrah jingsuk ha ak dew bah Europe.
