Ha ka jingpynbna ïa ka risol jong ka ilekshon MDC sha Khasi Hills Autonomous District Council (KHADC) ha ka Lah Sngi U Blei, ka Voice of the People Party (VPP) marwei ka la jop haduh 17 ngut ki MDC. Kane ka mut ba ka VPP ka la lah ban synshar hi marwei khlem donkam ban ïatreilang bad kiwei pat ki seng saiñpyrthei. Kane ka rai kaba la ai da u paidbah ha kane ka kynti ka long shisha kaba biang tam. Hangne ngin sa lah ban ïohi ïa ka rukom treikam ka jong ki. La kan long kaba kham biang na kiwei ki EC ne kaba kumno. Tang ka por ka ban sa batai.
Ha kine phew tylli snem ba la leit, kata hadien u 2004, ngi la ïohi ba u paidbah um shym la pynjop bun tang ïa kawei ka seng hynrei ban pynjop mar khyndiat bad ha kaba kut la ïoh beit tang da ki Sorkar synrop ne khleh khawlang. Ka jingbym ïoh ïa ka Executive Committee ka ban synshar beit tang da kawei ka seng, ka long shisha ka jingeh kaba khraw ha ka ban wanrah ne pyntreikam ïa ki mat kular ilekshon kaba ki la khlei sha u paidbah. Mynta ka kynti, ka jingai rai jong u paidbah ban pynjop bun ki MDC tang na kawei ka seng ka la long shisha kaba biang tam. Ngi donkam kum ïa kane ka rai u paidbah, lada long lei ha manla ki ilekshon khnang ba ngin ïoh la ka long ka Sorkar ne ka Executive Committee kaba khlaiñ bad kaba lah ban ai ka jingshakri kaba pura katkum ki mat kular ba ki la pynpaw.
Lah ban pynkynmaw ba ha u snem 2004, ki paidbah ka rilum Khasi ki la pynjop haduh 19 ngut ki MDC na ka Congress ban synshar ha KHADC. Mynta ka kynti, ngi la ïoh pat 17 ngut ki MDC na ka VPP bad kiba dei ruh ki khmat thymmai suda ban lamkhmat pat ïa ka jingsynshar na ka bynta ban thaw ïa ki aiñ ki kanun ban ïada ïa ka riti dustur, ka khyndew ka shyiap bad ruh ban kyntiew ïa ka ïoh ka kot, ka khaïi pateng nalor kiwei ki kam. Ngi donkam pat ban ai mynsiem ïa ki ba kin lah ban treikam katkum ka jingangnud jong u paidbah bad ban kiar na kaba kynthoh. Ngin nym lah ban shu ïohi noh mar mar ïa ka rukom treikam bad ngi sngewthuh ba kan shimpor katto katne ban lah ban sngewthuh bad pynjanai ïa ka rukom treikam.
Ka burom ka leit sha u paidbah uba la sngewthuh halor ka jinglong kordor ka kam synshar-khadar. Ngi la lait mynta na ka synshar khleh khawlang. Ngi sngewthuh ba haba don ka Sorkar khleh khawlang ka long eh shisha ban pyntreikam ïa ki mat ne pyndep ïa ki jingkular. Ngin nym lah ban pynhun lut ïa baroh. Lada kawei ka seng ka mut ban pyndep ïa la ka kular, kawei pat ka seng kan sa khohñioh mynsiem. Dei halor kane, ba haba don ka Sorkar khleh khawlang, ba ju thaw da kata ka Common Minimum Programme ka rynsan ka ban pynhun lut ïa baroh ki seng kiba ïatreilang. Hynrei haba ïoh ban synshar marwei, ym don jingeh bad lah ïaid beit shakhmat ban pyndep ïa la ki mat ki jura kiba la khlei hakhmat u paidbah. Kane kan pynsuk shibun ha kaba pyntreikam, khlem don jingwit nangno-nangno ruh. Kumjuh ban thaw bad wanrah ïa ki polisi treikam ruh kan pynsuk shibun. Haba don tang kawei ka seng, ki jingmut jingpyrkhat ruh ki long beit kawei.
Ngi dei ban ap ïa ka por. Ki don bun kiba ong ba ki dang dei ki briew ba dang shah jied thymmai kumno kin treikam bad haduh katno kin lah ban pynïaid ïa ka District Council kaba dei kawei na ki shlem treikam kaba kongsan tam. Ngim pat dei ban peit ne kdew kti ne rai hi na lade. Ngi donkam ban ap bad ïai shah, ailad ïa kine kiba thymmai, ki ban wanrah lang ruh bad ki ïa ka jingmut jingpyrkhat kiba thymmai ha ka rukom treikam. Ngim pat lah ban tip, ka rukom treikam kaba kumno kan long. Ïoh ki lah ban trei kham bha shuh shuh ïa kaei kaba kiwei ki la dep ban trei ne ïoh kim lah, tang ka por ka ban sa batai. Hynrei haba u paidbah u la pynpaw shai ba u la kwah ka jingkylla, ngi ïohi ba ka jingkylla ka la wan lyngba ka dur jong ka jingpynjop ha kawei ka seng ban lam khmat ïa ka jingsynshar. Kumta ngin hap ban ap ruh katto katne ba kita kiba la shimti ïa ka kam ban pynïaid shakhmat ïa ka kam synshar ba kin sa wanrah pat ïa ka jingkylla kaba thymmai katkum ka jingangnud jong u paidbah.
