Shillong, Rymphang 25
U Bah Tlanding Wahlang bad ka Kong Ibapaleishisha Nongkseh kiba dei shikurim ki la ïoh ban khur nam jop ha ka jingmareh marathon ba la pynïaid da ka Border Security Force (BSF) Punjab Frontier kaba la pynlong ha ka 23 tarik mynta u bnai ha Amritsar halor ka phangpdeng kaba ong, ‘Hand in Hand with Border Population’.
Ha kane ka jingïakob ba la tip kum ka Bordermen Marathon 2025, u Bah Tlanding u la wan ba-ar ha ka jingïakob mareh kaba 42 km jong kiba 40 snem shajrong ryngkat ka song pisa T. 50,000 bad ka Kong Ibapaleishisha ka la wan balai ha ka jingïakob mareh 10 km jong ki kynthei ryngkat ka song pisa T.15,000.
Kine shikurim ki la ïathuh ba mynta kin pynkhreh pat ban leit ïashim bynta sa ha ka jingïakob mareh marathon ka ban sa long ha ka 2 tarik u Lber 2025 ha ka Bhubaneswar Marathon ha Odisha bad baroh ar ngut kin mih na New Delhi ha ka 27 tarik mynta u bnai.
Kum ban kdew hangne, u Bah Tlanding u dei u nongmareh marathon ba paw ka Jylla uba la jop ruh bun tylli ki takma kumjuh ka Kong Ibapaleishisha bad ki dei ruh kiba shu im da ka rep ka riang bad ki shong ki sah ha Nongsangu, Ri Bhoi District.
