Shillong, Rymphang 25
Ka Mawlai SC ka la nangjan ban rah biang ïa ka nam lahduh ha ka sien ba lai ïa ka Shillong Premier League 2024 hadien ba la lah ban pynliem noh ïa ka Rangdajied United FC da 1-0 kol ha ka Sngi Ba-ar ha SSA Stadium kaba ha First Ground, Polo.
Kham ha shwa, ka Langsning FC ka la pynliem ïa ka Laitkor SC da 1-0 kol na ka bynta ban ïai bteng don ha ka kyrdan ba saw.
Katei ka nam jop jong ka Mawlai ka la wan urlong lyngba u Khraw-kupar Jana (36′), katba u Melambha Shabong (90’+2) u la lah ban thep na ka bynta ka Langsning.
Ka jingjop jong ka Mawlai ka la wan shwa ban wai ka jingïakhun kata ha ka minit kaba 90 minit bad kane ka la ktah jur ïa ka Rangdajied kaba la ïai sah ha ka kyrdan ba lai bad kam shym la don lad shuh ban don ha ka jingïaknieh ïa ka nam lahduh jong ka SPL 2024 wat la ka dang sah sa ar sien ïakhun ha kane ka lympung.
Kane ka jingjop ka la pynlong ïa ka Mawlai ban don 41 poiñ na ki 15 sien ïakhun ha kaba ka la tam da 5 poiñ ïa ka Shillong Lajong FC, kaba dang sah ha ka kyrdan ba-ar. Katba ka Langsning ka la ïoh biang ïa ka kyrdan ba saw (24 poiñ) kata hadien ka Laitkor (23 poiñ).
Ha kane ka jingïakhun ka Rangdajied ka la sdang ban ïalehkai ha kaba ka la ïoh haduh saw tylli ki kabu ksiar hapoh shiteng kynta. U Benny Khriam um shym la lah ban pynurlong hadien ba u la ïoh ban shut ïa ka bol, kumjuh u Ieitlang Syiemlieh u la shah khanglad noh ha u rangapkol ka Mawlai u Lambhamiki Lamare, katba u Balamlynti Khongjee bad u Owanijuh Pajuh ki la duh ei ïa ki kabu ksiar.
Katba ka Mawlai ka la paw kum ka kynhun kaba la pyrshang ban ïakhun tyngeh ha kane ka jingïakhun, hynrei ka la lah ban pynskhem ïa ka jingjop lyngba u Khrawkupar ha kaba u rangapkol ka RUFC u Meshan Banjop Sumer um shym la lah ban khanglad. Wat la ka RUFC ka la pyrshang ban pynphai lyngba u Benny, hynrei ka bol kaba u la shut ka la leit dei na diengkol. Haduh kaba kut kam shym la lah ban pynurlong bad ka la mad ïa ka jingshah rem.
Kham mynshwa, ka la long kumba ka Langsning bad ka Laitkor kin sa ïalehkai biang na ka bynta ban ïakhaid da 0-0, hynrei shwa ban wan ka la kylla da khongpong ha kaba ka Langsning ka la ïoh ban pynkhih jar shwa ban wai. Kane ka la wan urlong lyngba ka free-kick ba la shut da u Melambha ha kaba u rangapkol ka Laitkor u Hukumskhem Marbaniang um shym la lah ban pyllait na ka jingshah thep.
Ka jingïalehkai ha ka Sngi Balang kan long hapdeng ka Sawmer SC pyrshah ïa ka Ryntih FC ha ka por 3 baje janmiet.
