Shillong, Rymphang 25
Ka Meghalaya Pradesh Congress Committee (MPCC) kan sa shong jingïalang ban khmih bniah halor ka risol ba dang shu dep sha ar tylli ki Autonomous District Council jong ka Jylla.
“Ngin sa shong jingïalang na ka liang ka EC (ka MPCC) ban khmih bniah halor ka risol khamtam ïa ki jaka kiba ngi tlot. Ngin sa lum thup ïa ka kaiphod bad ngin sa peit hadien kane,” ong u Secretary ka MPCC, Bah Manuel Badwar.
Haba kylli, u la kubur ba ka seng ka la tlot khamtam hadien ka jingbym don shuh jong ki nongïalam.
“Ka jingphet noh ki nongïalam ha shuwa ka la ktah bha. Ki paidbah ruh ki duh jingshaniah wat la ki ieid eh ïa ka seng,” u la ong.
Ha kajuh ka por, u la pynpaw ka jingsngewkhia halor ka jinglong jong ki nongïalam ym tang jong ka seng hynrei jong kiwei pat ki seng haba ïadei bad ka jingkynthih na kawei ka seng sha kawei pat tang namar ka jingkwah bor.
Haba kdew ba ka Congress kan sa tei pynbha pat ïalade, une u nongïalam u la ong ba ka seng ka la sdang ban wad ïa ki briew kiba kham sani bad kiba khlaiñ ha ka nongrim bad ka jingmut-jingpyrkhat.
“Ngi la sdang ban wad ïa ki briew kiba kum kine hynrei ngi tip ba kan shim por,” u la ong.
Kum ban shu kdew hangne, ka Congress ha kane ka ilekshon ba la dep sha Khasi Hills Autonomous District Council (KHADC) kam shym la shah jied wat tang iwei ruh nongmihkhmat sha kane ka ïingdorbar. Ha Jaiñtia Hills Autonomous District Council (KHADC), ka seng ka la ïoh 3 ngut ki MDC.
Ka seng ka la pynïakhun haduh 28 ngut ki kyrtong ha KHADC lait noh ha Laban-Mawprem konstitwensi.
Ka konstitwensi ba ka seng ka la shah rem bad pynkyndit ïa kiba bun ha kane ka ilekshon ka dei ha Mawkhar-Pynthorumkhrah ba aireng da u MDC bad CEM barim, Bah Pynshngaiñ N. Syiem uba la ïoh tang 4442 ‘vote’ bad shah rem ha u kyrtong ka Voice of the People Party (VPP), Bah Strongpillar Kharjana da 2540 ‘vote’ uba la ïoh 6698 ‘vote’.
Kawei pat ka konstitwensi kaba ka Congress ka don jingkyrmen ka dei ka Malki-Laitumkhrah, hynrei ha kane ka konstitwensi ruh u kyrtong ka seng, Bah Manuel Badwar uba la ïoh 4142 ‘vote’ u la shah rem noh ha ka kyrtong ka VPP, Kong Deiti Majaw da 819 ‘vote’ kaba la ïoh haduh 4691 ‘vote’.
Ha ki ar tylli konstitwensi kiba ki kyrtong ka Congress ki la wan ba-ar ruh ki lah shah tam kput, ba kynthup ha Jirang ha kaba u kyrtong ka NPP uba dei u MLA, Bah Sosthenes Sohtun u la pynliem noh ïa u MDC, Bah Victor Ranee da 7832 ‘vote’, bad ha Sohryngkham, u kyrtong ka VPP, Bah Bill Clinton Wankhar u la pynliem ïa u Bah Jonathan Syiem da 6752 ‘vote’, katba ha ki 24 tylli kiwei pat ki konstitwensi, ki kyrtong ka Congress kim shym la lah ban khie-khlieh satia.
Haba phai pat sha JHADC, ka seng ka la pynïeng haduh 20 ngut ki kyrtong, hynrei ka la ïoh jingjop tang ha lai tylli ki konstitwensi, ba kynthup ha Amwi-Khliehtyrshi ha kaba u Bah Madonbai Rymbai u la jop ïa u kyrtong ka NPP, Bah Lakhon Dkhar, da 988 ‘vote’, ha Saphai-Sahsniang u Bah Rikut Pareiñ u la jop ïa u kyrtong ka NPP, Bah Remdor Kupar Lyngdoh da 289 ‘vote’, bad ha Saipung-Nongkhlieh u Lalwilliama Theite u la jop ïa u kyrtong ka NPP, Bah Arbor Hima Darnei da 299 ‘vote’.
