Washington, Rymphang:
Ka United States, ha ka Sngi Nyngkong, ka la pynjari kyndon thymmai biang ia palat 30 ngut ki briew bad ki jhad, kiba don jingiadei bad ka Iran, kynthup ia u khlieh jong ka kompeni umphniang katei ka ri, kiba long ki nongpyniaid bad ki nongpeit ia ka die- ka thied bad ka khaii umphniang ha Iran Iran.
Kine ki jingpynjari ki bud ïa ka rai jong u President Donald Trump ha kaba sdang jong une u bnai ban pynneh biang ïa ka polisi ‘Maximum Pressure’ jong u ïa ki jingpynjari pyrshah ïa ka Iran, kaba kdew kti ïa ki rukom treikam jong u ha ka samoi treikam ba nyngkong jong u.
Kum ka Russia, ka Iran ka shaniah ha ka kam jong ki lieng kit umphniang kiba pynlong ïa ka jingpynpoi umphniang na kawei ka lieng sha kawei pat shabar ki um ba la buh kyrpang ban lait na ki jingpynjari jong ki ri Sepngi, kaba ai ïa ka ri — bad ïa ki shipai jong ka — ïa ka lad kamai kaba kongsan.
Napdeng kito kiba shah thombor ha ka sngi Nyngkong, u dei u Hamid Bovard, uba dei u myntri ba dei peit ia ka kam umphniang jong ka Iran bad u heh ophisar jong ka National Iranian Oil Company (NIOC).
Ka ri America mynshwa ka la jied ïa ka NIOC na ka bynta ban ai jingkyrshan ïa ka tnad treikam bar ri jong ka kynhun shipai jong ka Iran.
Kiwei pat kiba la shah ktah ha ka sngi Nyngkong ki kynthup ïa ki nongkhaïi umphniang kiba don ha United Arab Emirates bad Hong Kong, bad ki nongpynïaid ïa ki kali kit umphniang bad ki nongpynïaid ha India bad China.
La ong ba kitei ki lieng kiba la shah pynjari, ki dei kiba ju iarap ban kit da ki phew million ki tyndong umphniang heh kiba shongdor da ki spah million dollar.
Ka tnat kam bar ri jong ka US, ka la ong ha ka Sngi Nyngkong ba ka dang jied sa 16 tylli ki kompeni bad ki lieng kiba donkti ha ka kam shna umphniang bad umphniang jong ka Iran.
Kane ka jingpynjari kyndon jong ka US ka long ka sien kaba ar kaba thmu ïa ka jingdie umphniang jong ka Iran naduh ka jingthoh jingkynmaw jong u Trump ha ka 4 tarik u Rymphang ban pynjari bad pynshitom jur ïa ka Iran.
