Ka ju don shisien lano ka aïom ha kaba kawei ka seng saiñpyrthei kan lah ban pynkhih pyrthei da ka jingshitrhem ïa ki paidbah ha ka por ilekshon. Kaba kum kane, ngi la ïohi mynta sa ha kane ka ilekshon MDC kaba dang shu kut shen lyngba ka Voice of the People Party (VPP) kaba la ïeng ha ka shap jong U Prah. Wat la kam shym la ïoh jingjop bun na Rilum Jaiñtia bad jop bun marwei ha Rilum Khasi, hynrei kane ka seng haba la kheiñ kyllum ka la ïoh da ki lak ka ‘vote’ ha kane ka ilekshon. Ka jingjop kput na Mawlai, Mylliem bad ruh na kiwei kiba bun ki konstitwensi, bad ka jingïoh rah ruh ka jingjop na Jaïaw-Mawprem, Mawkhar-Pynthorumkhrah bad ruh na Laitumkhrah-Malki, ka la pynkhih jingmut ïa ki paidbah kiba don ha kiwei pat ki konstitwensi ban sdang wad ïa U Prah. Ngim lah ban len ïa ka jingshisha ba ka VPP bad U Prah ki la ai jingkyrmen ïa ki paidbah.
Nalorkata, ha ki katto-katne tylli ki konstitwensi kum ha Umsning, Nongthymmai, Mawphlang, Nongstoiñ, Mawhati, Umroi, Mawkyrwat bad kiwei, U Prah u la lah ban peh ha ban da biang. Ki la don ki MDC ba la leit noh, kiba la poi shaduh ka kyrdan ba-ar bad wat ba lai tang namar ka jingwan peh U Prah ha kaba ka ‘vote’ ka la pait la pra laki-laka. Haba la peit bha ïa ka jingmih na ka ilekshon, ki seng kiba la shah ktah jur na ka jingwan jong U Prah bad ka VPP ki dei ka NPP, UDP, HSPDP bad Congress. U Prah u la lah ban knieh bha ïa ki ‘vote’ na kine ki seng haduh ba ki kyrtong ki la shu liem naphang khlem ithuh-ithaw. Ngi lah ban ong ba ha ki katto-katne ki konstitwensi, ka la don kata ka lyer kaba beh sha ka VPP bad kata kajuh ka lyer pat ka la lynshop ïa kiwei pat ki seng bad ki kyrtong.
Ka jingmih na ka ilekshon ha Mawlai, la ïoh ban sakhi ba naduh ka ilekshon MLA, MP bad ha kane ka MDC ruh ka VPP ka la ïoh ka jingjop kaba heh, naba wat lada kheiñ kyllum lut ïa ki ‘vote’ jong ki kyrtong kiba ïakhun pyrshah kumjuh u NOTA, u kyrtong ka VPP u dang tam bun shah. Na ka bynta ki samla pule kiba ïadon bynta ha ki kam wad bniah, lehse kan bha lada ki lah ban leit sha Mawlai ban pynlut por bad ban tih bniah ïa ki daw kiba la pynlong ïa ka ilekshon MLA, MP bad MDC ka ban sah kynmaw pateng la pateng. Imat kaba kum kine ki ilekshon kim pat ju don ha Mawlai naba ki samla, longkmie, rangbah, kynthei bad shynrang, ki la ïa mih paidbah ban ïa ai ka jingkyrshan tylli-tyllan ïa u kyrtong ka VPP. Ha Mawlai, u kyrtong ka VPP, Bah Eddieson Kharumnuid u la ïoh haduh 22,619 ‘vote’ katba u kyrtong shimet uba wan ba ar, Bah Teiborlang Pathaw u la ïoh 10,272 ‘vote’. Ngi lah ban ong ba ha Mawlai, mynta ka kynti ka la dei kata ka ‘wave election’.
Hynrei, ka lyngkor kaba khia mynta ka don ha ki tyrpeng jong 17 ngut ki MDC ka VPP khamtam haba kin ïalam ïa u lakam synshar hapoh ka KHADC. Ki paidbah mynta kin khmih lynti ba ka VPP kan lah ban ai kata ka jingshakri kumba ka la dep ban pynsngew bad pynsawa kylleng ki shnong ki thaw haba ka la leit ban ïalap ilekshon. Ngi ïohi ba kine ki MDC ka VPP baroh ki dei kiba dang thymmai suda bad dei tang u MDC ka Jowai u Bah Andrew A Shullai uba la long teng u MDC. Haba phai sha KHADC, ka VPP ka ban ïalam hi ïa ka EC kan sa hap mad ka jingïatyngkhuh ne shah ther tyngeh pat ha ki MDC ka Liang Pyrshah, kum jong u Bah Titosstarwell Chyne na ka UDP, ka Kong Grace Mary Kharpuri na ka NPP bad ruh kiwei kiwei. Ngi sngewthuh ba ngin sa mad ïa ka dorbar ban wan jong ka KHADC kaba itynnad bha namar wat la ki MDC ka VPP ki dei kiba dang thymmai hynrei haba phai sha ka jingstad bad ka jingnang jingtip, ki dei kiba la biang pura.
