Shillong, Rymphang 26
Hadien khatsan snem ba ka Shillong Lajong Football Club ka la ïashim bynta ha ka lympung ïalehkai I-League, ka Sorkar Jylla ha ka Sngi Balang ka la pynkup burom ïa kane ka klob da ka khusnam pisa kaba T. 1 klur tyngka halor ka jingnoh synñiang kane ka klob ha ka kam ïalehkai phutbol.
Ïa kane la pynkup burom da u Myntri Rangbah ka Jylla u Conrad K. Sangma ha kaba la ïadon 2
lang ki heh ophisar kiba kynthup ïa ka Kong Matsiewdor War Nongbri, Commissioner Secretary ka tnat ïalehkai u Vijay Kumar kumjuh Director ka tnat ïalehkai u DD Shira, ki nongïalam ka Meghalaya State Olympic Association (MSOA) ba kynthup Working President Bah John Kharshiing, General Secretary Bah Finely Lad Pariat lem bad ki nongïalehkai bapher bapher.
Lah ban kdew ka Shillong Lajong ka la ïoh rung sha ka I-League naduh u snem 2009 bad ha u 2011 ka la hiar noh sha ka Second Division, hynrei ha u 2012 ka la kiew biang sha ka I-League haduh u 2019. Kane ka klob ka la hiar biang sha ka Second Division ha u 2019 bad ha u 2022 ka la kiew biang sha ka I-League ha kaba ka la lah ban pynneh ïalade haduh mynta u snem 2025.
Kumba ka paw kane ka klob ka la lah ban sei ïa bun ngut ki khlur ïalehkai na ka Jylla kumjuh na ka thaiñ shatei lammihngi kiba la long kiba paw ha kane ka kam ïalehkai wat haduh ba ki la ïoh ruh ban ïashim bynta na kiwei pat ki klob ha ka Indian Super League.
