Shillong, Rymphang 26
Ka Dorbar Shnong Mawsynram hadien ba ka la ïoh jingtip ba kan don ka jingwan lehniam hapoh ka krem Mawjymbuiñ da ki ‘riewngeit Hindu ïa kaba la khot pynlong da ka Kutumba Suraksha Parishad (KSP) ka la pulom noh hadien ba ki nongïalam shnong bad ki paidbah jong ka shnong ki la mih paidbah ban pyrshah ïa kane ka jingthmu jong ki.
Haba ïakren bad u Assistant Rangbah Shnong ka Mawsynram, Bah Hiamdor Rapsang, u la ong ba hadien ba ki la ïoh jingtip ba kane ka kynhun jong ka KSP ki la ïawer ïa kiba bun ki ‘riewngeit jong ki ba kin wan shane sha ka krem Mawjymbuiñ na ka bynta ka jinglehniam ka jong ki ha kaba ki la tong ïa ka um napoh ka ‘Mahakum Festival’ na UP bad kin wan ban theh ïa kane ka um ha u Mawjymbuiñ hangne ha Mawsynram.
Kumta na ka liang ki nongïalam shnong bad ki paidbah nongshong shnong ki la ïa mih paidbah ban pyrshah halor kane ka jingthmu ka jong ki ban wan lehniam hapoh kane ka krem.
“Ngi la pyntip sha ka Deputy Commissioner, u Superintendent of Police ka East Khasi Hills District bad sha u Officers In-charge ka Mawsynram Police Station ïoh ba kan mih kano-kano ka jingkulmar ba na ka liang ka shnong kam ailad ïa ki, hynrei ki la sngewshngaiñ ba na ka liang ka DC ka pyntip ba lada ki wan ruh ki dei ban bud ryntih ïa ki SOP,” u la ong. U Bah Rapsang u la ong ruh ba na ka liang ka jong ki, ki la kyrpad jur ba kin shah ba kin theh ïa kata ka um kaba ki la wanrah, hynrei ki la kren shai ba kine ki dei kum shibynta jong ka leh niam leh rukom.
“Kane ka jingwan ka jong ki ka la long ruh kum ka jingpynjynjar ïa ka shnong ha kaba ki la dep ban kren shai ba ki dei ban hun tang ban shu wan bad ki lah ban pynlong ka jingduwai ba jar-jar bad tang kane ki lah ban shah,” u la ong.
U la ong ruh ba kane ka jingwan ka jong ki kam shym la long katkum ka jingïakren hapoh ka kamra treikam jong ka DC bad kane ka jingthmu jong ki ban wan theh um ha une u Mawjymbuiñ ka long kum ka niam ka rukom ka jong ki bad kane ka la long ka jingpynkheiñ ïa ki SOP.
U Bah Rapsang u la pynkynmaw ruh ba ha ka 3 tarik jong u Kyllalyngkot mynta u snem, kane ka kynhun ki KSP ki la wan sha Shillong da ka jingkhot jong ka DC. Ha katei ka jingïakynduh lang ka la don ka jingïakren kaba shai ba ka shnong Mawsynram kan ym ailad ha kaba ïadei bad kano-kano ka leh niam leh rukom hangtei hapoh krem Mawjymbuiñ hynrei ngi bat ïa ka nongrim ba kane ka krem ka dei tang ka jaka jngoh kai.
“Ka shnong ka pdiang sngewbha lut ïa baroh kiba wan hynrei ki dei ban wan kum ki nongjngoh kai bad ki dei ban bud ryntih ïa ki kyndon kiba na ka liang ka shnong ki la dep ban ai, ïa ka jingleh niam te ngi khang la ki wan na kino-kino ki kynhun jingngeit,” u la ong.
U Bah Rapsang u la ong ruh ba hadien ba la mih kum kine ki jingjia na ka liang ka shnong ka la kham peit pyrman bha, hynrei ngim tip ïa kaei ka daw kaba pynlong ïa ki ba kin wan sha kane ka krem haba ha ka jingïalang ki la shai ïa ka nongrim jong ka shnong. U la pynpaw ruh ba kine ki KSP ki dei ban ai ka jingïatreilang bad ka shnong lada ki wan ha kano-kano ka por ki dei ban don ka jingïatreilang bad ka shnong.
