Washington, Rymphang:
U President ka Ukraine, u Volodymyr Zelensky, la ong ba ha kane ka por u la pynpaw ia ka jingthmu jong u ban leit jurip sha United States ha ka Sngi Thohdieng naka bynta ban ioh ban ïakynduh markhmat ïa u President jong ka U.S., u Donald Trump, hadien ba ki heh sorkar ki la mynjur ïa ki kyndon halor ka jingthmu jong ka jingïateh kular haba iadei bad ka jingkhaïi ia ki marpoh khyndew jong ka Ukraine.
Hynrei na ka liang ka White House, kam shym kren ne pynpaw eiei haba iadei bad kane ka bynta.
Ka jingïateh marpoh khyndew ka dei ka pdeng jong ka jingthmu jong ka Ukraine ban ïoh ïa ka jingkyrshan jong ka U.S. katba u Trump pat u dang ialeh shitom ban thaw- lad thaw- lynti ban ioh ban pynkut noh kloi ïa ka thma jong ka Ukraine bad ka Russia. Hynrei kaba kham sngew artatien ka long ba ka US bad ka Ukraine dang ha kine ki khyndiat sngi ba la leit, ki don hapdeng ka jingiapher jingmut hadien ba utei u nongialam ba thymmai ka US u la kylla ktien pynban haba iadei bad ka jingiakynad hadpeng ka Russia bad Ukraine bad shim ba baroh ka daw jong ka thma ka dei pynban na ka daw jong ka Ukraine hi. Kumta, kane ka la wanrah ia ka jingpyrshah jur na u nongialam ka Ukraine- u Zelensky, naba dei ka US hi kaba ju ai jingkyrshan ia ka Ukraine naduh kaba sdang jong ka jingleit hiar thma jong ka Russia sha Ukraine. Hynrei, ka US ka kyrshan ia ka Ukraine tang ha ki por ka jingsynshar jong u Joe Biden kum u President jongka ha kine ki snem ba la leit.
Hynrei, ha kane ka por pat, la ong ba u Trump u la khot sin pynban ia u Zelensky da u “nongsynshar donbor” bym sngewtynnad bad ba u dei ban hiar shuki noh bad ka Ukraine ruh ka dei ban pyndem noh hakhmat ka Russia lada ka kwah ba ka thma kan kut noh.
Ha kajuh ruh ka por, na ka liang ka United States, u Trump u la wanrah ia ka jingtyrwa sha ka Ukraine ba ka dei ban iatrei lang bad ka US haba iadei bad ka jingkhaii ia ki marpoh khyndew jongka, ha kaba ki heh sorkar na baroh arliang ki la mynjur ia katei ka jingtyrwa bad ki la ai jingmut ba dei ban soi ia ka, naba la ong ba kane ka jingiateh, ka lah ban plie lad ia ka spah marpoh khyndew kaba khraw jong ka Ukraine sha ka U.S., ha kaba u Trump, un khyllie biang ia ki spah klur tyngka ki jinglut- jingsep, ban siew kylliang ia ka United States, na ka bynta ka jingkyrshan jongka sha ka Ukraine baroh shi katta.
