Nongstoiñ, Rymphang 27
Hadien shi bnai tam na ka liang ka shnong Mawmarin ha West Khasi Hills ka la khang noh ïa u tower ka kompeni Airtel uba don hapoh ka shnong bad khlem lah ban ai ka jingshakri ïa ki paidbah nongshong shnong, ha ka 26 tarik Rymphang 2025 na ka liang ki briew ka kompeni lyngba u Deputy Manager Bah Kheiñkor War ryngkat ki nongïalam shnong ka Mawmarin ki la ïoh ban ïa pynbeit halor katei ka kynrum-kynram bad hadien ka jingïakren sngewthuh bad ka jingkyrpad na ka liang ka kompeni ban aipor tang shi bnai ban pynbit pynbiang ïa utei u tower.
U Bah Brocklin Lyngdoh, Sordar Shnong Mawmarin u la ong ba na ka liang ka shnong ka la shah biang ïa ka kompeni ban plie biang ïa utei u tower.
Shuh shuh, u la ong ruh ba lada ka kompeni Airtel kam lah ban pynbiang ïa ka network hapoh kane ka por ba la ïakut, na ka liang ka shnong kan ym shah shuh da lei-lei lada na ka liang ka kompeni kan kyrpad biang hadien- habud.
Lah ban kdew hangne ba une u tower Airtel u don hapoh ka shnong Mawmarin la kumba 3 snem. Hynrei kaba sngewsih ka long ba utei u tower um lah ban ai ka jingshakri ïa ki paidbah khamtam ïa ki nongshong shnong ka Mawmarin kaba la pynlong ïa ka shnong ban khang tala shisyndon ïa utei u tower ha ka 20 tarik u Kyllalyngkot mynta u snem.
