Shillong, Rymphang 27
U Myntri ba khmih ïa ka tnat Jngohkai ka Jylla uba dei ruh u Nongaiktien ka Sorkar Meghalaya Democratic Alliance (MDA-II), Bah Paul Lyngdoh u la ong ba ka don ka jingpynsngew kaba long la kajong-kajong ha kaba ïadei bad ka jingthmu ban wanrah ïa ka lynti rel ha East Jaiñtia Hills, bad ka Sorkar kan sa bishar tarajur bha.
Hadien ba u MLA ka Khliehriat uba dei ruh u Myntri Sorkar, Bah Kyrmen Shylla ha ka sngi Ba-ar u la ong ba ki paidbah ha Jaiñtia Hills ki dei ban ïoh ka lad ba laitluid ban shim rai halor ka jingwan ka lynti rel, khlem ka jingtuklar jong kiba na shabar, ka la mih ka jingpyrshah kaba jur na ki kynhun sengbhalang ha ka sngi ba bud.
Halor kane kajuh ka phang na ka liang u Myntri Rangbah ka Jylla, Conrad K Sangma u la ong ba lada ka don ka jingkyrshan na ki paidbah ka East Jaiñtia Hills, lehse ka Sorkar ka lah ban ïaid shakhmat bad kane ka projek ha katei ka thaiñ.
Haba ïakren pat bad u Bah Paul Lyngdoh ha ka sngi Palei, u la ong ba ha kaba ïadei bad ka lynti rel ka don ka jingpynsngew ba ki don ki ba kyrshan bad ki don ruh kiba pyrshah.
“Ha kaba ïadei bad kane, ka don ka jingpynsngew kaba ïakhleh, ka sur ka pher la ka long na ki nongthaw aiñ, ki sengbhalang, bad kiwei kiba don bynta. Namar ba don bun jait ki sur, ka dei ka kamram jong ka Sorkar ban shim ïa ki sienjam da kaba bishar tarajur bha”, u la ong.
U Bah Paul u la ong ba ka Sorkar kan sa shim ïa ka rai katkum ka jingkwah jong ki paidbah.
Haba kylli, u Myntri u la ong, “Kaba ju leh barabor, ngi pyrshang ban shim ïa ka jingsngew ki paidbah, kam da donkam eh ban dei da ki ‘public hearing’, hynrei da ka jingsngewthuh ïa ka jingkwah ki paidbah bad kumjuh da kaba sngewthuh ban pynbiang tarajur hapdeng ka roi ka par bad ka jingïada ïa ki paid nongshong shnong”.
Haba kylli shuh shuh, u Myntri ba khmih ïa ka kam Jngohkai u la ong ba ka tnat kam pat leh kano-kano ka jingpule bniah ba ka lynti rel kan kyntiew ïa ka kam jngohkai.
“Ha ka jingshisha nga la ju kren barabor ba ha kaba ïadei bad ka kam jngohkai ha Meghalaya, ki jaka jngohkai kin kiew lada ki surok ki bha ki biang”, la ong u Bah Paul.
