Washington, Rymphang:
U heh spah ba paw nam duh jong ka US- u Elon Musk, u la leit sha ka jingïalang jong ka kynhun Myntri ba nyngkong eh jong u Donald Trump, Presi-dent jong ka US, ha ka samoi treikam kaba 2 jong u ha ka Sngi Balang, hapdeng ka jingkynthoh kaba jur halor ka jingpynhiar dor jong u ïa ka sorkar. U Musk, uba ialam ïa ka tnat Department of Government Efficiency (DOGE), kaba thmu ban pynduna ïa ka jinglut da kaba pynduna ïa ka sorkar pdeng bad pynduna ïa ka jingpynlut, u la iathuh ha ka kynhun Myntri ba u la ïoh pdiang bun tylli ki jingshah byrngem pyniap naduh ba u la sdang ban paw khmat bha ha ka kam saiñ pyrthei naduh ba u Trump u la shimti ïa ka shuki President jong ka US ha une u snem.
Kane ka jingkren jong u ka long ruh hadien ba u Trump u la kyrpad ïa u ban ieng bad batai kumno ka DOGE ka treikam bad kiei ki rukom treikam ba pura jong katei ka tnat.
U Musk, uba la phong ïa ka sopti baseball kaba rong saw kumba ju phong, hadien kata, u la ieng bad ong ba u khot ialade kum u ‘nongkyrshan ba lehrit’.
Kumtar uh u Elon Musk u la ieng bad pynshai ba ki jingthmu ba kongsan jong ka DOGE ka long ban iarap ban tehlakam ïa ki jingtlot bad jingduna kiba pher ba ka US ka iakynduh baroh shi katta.
