Shillong, Rymphang 28
Ka Sorkar Jylla ka la kut jingmut ban pynlong ïa ka Meghalaya sha ka Jylla kaba kynjoh ha ka ïoh ka kot kaba 10 billion dollar hapoh u 2028.
Haba kren ha ka sngi sdang jong ka Dorbar Mang Tyngka, u Lat ka Jylla, CH Vijayashankar u la ong, katba ka Jylla ka dang ïai bteng ïa ka jingïaid lynti ban pynpoi ïa ka Meghalaya sha ka ïoh ka kot kaba 10 billion dollar ha u snem 2028, la ithuh ïa kane ka khyllipmat kum ka lad ban pynskhem biang ïa ka jingkut jingmut jong ka Sorkar sha ka roi ka par jong kane ka Jylla ba khraw. “Mynta ka sngi, ngi ban biang ïa ka kamram jong ngi ban ïatrei-lang na ka bynta ka lawei kaba phyrnai jong ki paidbah ka Meghalaya. To ngin ïatylli ha ka jingbeh ïa ka jingkiew shap-hrang ka ban pynïaid da ka jingthmu lang jong ngi na ka bynta ka Meghalaya kaba roi bad kiew shaphrang,” u la ong.
U la ong ba ka Sorkar ka don ka jingpyrkhat ïa ka Meghalaya kaba pynbiang ïa ki jingdonkam bad ki jingangnud ba kyrpang jong ki nongshong shnong bad ban pynurlong ïa kane, ka Jylla ka la wanrah ïa ka rukom pynroi kaba pynpaw ïa ka mynsiem ki nong Meghalaya.
U la ong ruh ba ka sorkar ka dang pynwandur ïa ka rukom treikam kaba pynïasoh ïa ka jingstad tynrai bad ki buit treikam ba mynta ba kin seisoh bha.
“Ngi la kiew bha ha u snem ba la dep, da kaba wanrah ïa ki buit thymmai kum ka CM CONNECT bad Hello Meghalaya. Kine ki jingpyrshang ki la kyntiew ïa ka teknoloji kaba ïarap ban buh ïa ka kolshor ba im jong ka Meghalaya hakhmat eh bad ban pynthikna ïa ka jingsynshar kaba treikam bha na ka bynta ki nongshong shnong jong ngi”, la ong u Lat.
U la ong ba ka jingpynjanai ha ka rukom treikam ha ki bynta kum ki surok, ka bor ding, ka jingpynbiang um, ka jingkyntiew ïa ka jingkynshew kam, ka IT&C, ka kam jngohkai pyrthei, bad ka rep ka riang kan pynkiew ïa ka ïoh ka kot ha ka Jylla bad ki prokram ba la shim ha ki bynta jong ka koit ka khiah, ka pule puthi, ka jingplie lad ban kamai jakpoh, ka jingshngaiñ ha ka imlang-sahlang bad ka jingsynshar kaba pynshong nongrim ha ki nongshong shnong kan pynthikna ïa ka jingbha jingmiat jong iwei-pa-iwei nongshong shnong.
Haba kren halor ki polisi bad ki prokram jong ka sorkar MDA, u Lat u la ong ba ka jylla mynta ka dang pyntreikam ïa ki projek ba bun jait ba la ïarap nabar, ha ki bynta jong ki surok, ka bording, ka rep ka riang, ka jingpynneh jingpynsah ïa ka um bad ka kam jngohkai pyrthei, u la ong ba ïa kine ki projek la bei tyngka da ki tnad ba bun jait kum ka World Bank, ka New Development Bank, ka Japan International Cooperation Agency bad ka Asian Development Bank, bad 72 percent na ka jingbei pisa hapoh kine ki projek ka dei kaba la ai jingïarap da ka Sorkar India, katba ïa kaba sah la noh synñiang da ka Sorkar Jylla.
Ha ka jingkren u Lat, u la kdew ruh ïa ka jingkyrshan pisa na ka Ministry of Development of North-Eastern Region (DONER) lyngba ki skhim bapher-bapher ba kynthup ïa ka PM DeVINE, kaba la mang pisa haduh T. 395 klur mynta u snem na ka bynta 4 tylli ki projek. Kine ki kynthup ka jingshna ïa ki surok ha New Shillong, ka jingshna ïa ka IT Park ha Tura, ka jingshna ïa ka Skywalk, ka Tourist Hub ha Dympep, bad ka jingshna ïa ka Passenger Ropeway ha Lum Shyllong.
Haba ban jur ïa ka jingdonkam jong ki surok lyngba ka tnat ba dei khmih, u Lat u la ong ba la mynjur katto-katne ki projek surok kiba kongsan mynta u snem ban pynbha ïa ka jingpynïasoh sha ki jaka ba kyndong bad kiba jngai.
Haba ai jingkren lamphrang, u Lat ka Jylla u la kren tang kumba san minit eiei namar ka jingbym sngew khlaiñ ka met, hynrei katkum ka kyndon pynïaid dorbar baroh ki jingkren jong u la shim ba la kren lut da kaba la ai ïa ka jingkren da ka jingthoh sha baroh ki dkhot ka Ïingdorbar.
