Shillong, Rymphang 28
Ka MDC na Nongshken Konstitwensi, Kong Grace Mary Kharpuri ka la ong ba ngi dei ban klet noh ïa kiei-kiei kiba ngi la ïakhun ha madan thma hynrei ngi dei ban ïatreilang ban wanrah ïa ka burom ka council.
Haba kren ai khublei ïa u Chief Executive Member (CEM) bathymmai ka council, Bah Shemborlang Rynjah, ka Kong Grace ka la ong ruh ba kum u khlieh duh jong ka council u ban pynïaid beit pynïaid ryntih ïa ki kam hapoh ka council bad buddien lem ïa ki kam ba dangsah jong ka council ka la kyrpad ïa ka EC ruh ba kan ïatrei lang ryngkat bad ka liang ïatei ym ban thew shiliang ïano-ïano.
“Nga ïeng ba ngan ai ka jingmut ïa phi kum u khlieh duh jong ka council ba phin pynïaid beit pynïaid ryntih ïa ki kam kiba dei jong ka council, khamtam eh ha kaba ïadei bad ki tnad treikam bapher-bapher ba phin sngewbha ban bud lem ïa kiei-kiei baroh kiba dangsah teng namar ba lada ki sahteng kumto kam long kaba bha bad ngi na ka liang ïatei ngin don ryngkat bad phi kum ka EC baroh kawei bad na ka liang ka jong phi ka EC ruh phin ïatrei lang ryngkat bad ngi ka liang ïatei khnang ba kan ym don kano-kano ka jingñiew shiliang ïano-ïano,” ka la ong.
“Kum u khlieh duh ka council phi dei ban long u briew ba kylluid mynsiem bad ngin ïa klet noh ïa kiei-kiei ki ba la dep ha ka madan thma, hynrei mynta ka kynti kane kam dei shuh ka madan thma ka jong ngi hynrei ka dei pat ka jaka kaba ngi wan ban ngin ïatei na ka bynta ka bha ka miat ka council, ka ri bad ka jaidbynriew bad khamtam na ka bynta ki konstitwensi bapher-bapher kiba ngi mihkhmat,” ka la ong.
Ka Kong Grace ka la ong ruh ba kam dei ban long ba tang ba la ïoh bat ïa ka shuki kaba halor ban leh shiliang ïano-ïano hynrei nga kyrmen ba phin ïalam bha ïa ka council baroh kawei bad ym tang kata hynrei nga ngeit ba U Blei un ai ïa phi ka jingstad ka jingshemphang wat la phi dang dei ka sien kaba nyngkong ba phin jop ïa kane ka ilekshon bad ba phin shimti ïa kane ka shuki. Ka la ong ruh ba nga kyrmen ba phin ai ïa kaba bha tam bad ka jingshakri ka ban kyntiew ïa ka council sha ka burom.
Katba, na ka liang ka MDC na Mylliem konstitwensi, Kong Aibandaplin Lyngdoh Nonglait ha ka jingïashim bynta ban ai khublei ïa u CEM bathymmai, Bah Shemborlang Rynjah, ka la ong ba kane ka shuki CEM jong ka KHADC kaba phi la shimti nga ngeit skhem ba ka dei ka jingjied jong U Blei.
Ka Kong Aibandaplin ka la ong ruh ba ngi la ïa treikam lang hapoh ka seng la kumba katto-katne snem, nga la ithuh ba phi long u briew uba tbit, ba don ka jingnang ka jingstad ka jingtip, phi long ruh u briew uba ïohi jngai bad phi long ruh u briew uba ngi lah ban shaniah bad ngi ngeit skhem ba ngin ai shuh-shuh ka jingshaniah ha kaba ïadei bad ka council khamtam ba ngi don ïa ka dawbah ka dawsan kaba ngi don ka jingïadei bad u paidbah kaba ngi hap ban ai ka jingshakri kaba hok kaba shisha hapdeng jong ki.
“Nga ngeit skhem ba phin long u briew uba sheptieng nyngkong ïa U Blei bad haba ngi don ka jingsheptieng ïa U Blei, ka mut ka dei ka jingsdang jong ka jingstad, nga ngeit skhem ba U Blei un ïalam lynti ïa phi,” ka la pynkut.
