Patna, Rymphang:
Haba dang sah kumba 8 bnai na ka bynta ka ilekshon sha ka ïingdorbar thawaiñ ha Bihar, u Myntri Rangbah ka jylla u Nitish Kumar ha ka sngi Balang u la pynïar ïa ka kynhun Myntri jong u da ki hynñiew ngut ki Myntri bathymmai, ha kababaroh ki dei na ka seng BJP kaba ïatreilang. Mynta ka kynhun Myntri ka don 36 ngut ki Myntri kynthup ïa u Myntri Rangbah, ka jingkheiñ kaba heh tam kaba la shah ha ka jylla, kaba don ïa ka ïingdorbar kaba 243 ngut ki dkhot jong ka, ha ka sien kaba nyngkong naduh u snem 2005.
Ka BJP, kaba dei ka seng kaba halor kaba la ïatreilang, ka don mynta 21 ngut ki Myntri, bud sa ka seng JD(U) jong u Nitish, kaba don 13 ngut bad ka Hindustani Awam Morcha (Secular) kaba don uwei. Ka jylla ka don ruh ïa u Myntri shimet.
Kane ka jingjia ka la jia shisngi hadien ba u heh ka BJP ka jylla u Dilip Kumar Jaiswal u la iehnoh ïa ka kam kum u Myntri ka Land and Revenue ban bud ryntih ïa ka polisi jong ka seng”uwei u briew, kawei ka kam”. Ka Bihar ka don ruh ïa ka Legislative Council.
Ki dkhot ka kynhun Myntri bathymmai (bad ki shuki Assembly jong ki) ki long: u Myntri barim u Jibesh Kumar (ka shuki Jale ha Darbhanga distrik); u Krishna Kumar Mantoo (Amnour, Saran district), u Sanjay Saraogi (Darbhanga seat), u Motilal Prasad (Riga, Sitamarhi distrik); Sunil Kumar (Biharsharif, Nalanda distrik); u Vijay Kumar Mandal (Sikti, Araria distrik); u Raju Kumar Singh (Sahebganj, Muzaffarpur distrik).
Ka jingpynïar ka ai jingmut ban pynleit jingmut ha ki jaka ba ka BJP ka don ka jingdon kaba bha. Na ki 7 ngut ki Myntri, 6 ngut ki dei na North Bihar bad uwei pat u dei na Nalanda. Arngut ki Myntri ki dei tang na ka thaiñ Mithilanchal jong ka Darbhanga.
Ka rai ka pyni ruh ïa ka jingpyrshang ban pynïadei ïa ki kynhun jaitbynriew. U Raju Kumar Singh bad u Jibesh Kumar ki dei na ka jaidbynriew Rajput bad Bhumihar kiba don ha ka jaitbynriew ba shalor. U Vijay Kumar Mandal bad u Motilal Prasad ki dei na ka jaitbynriew kaba sahdien palat (EBCs). U Krishna Kumar Mantoo (ka jaitbynriew Kurmi), u Sunil Kumar (ka jaitbynriew Kushwaha), bad u Sanjay Saraogi ki dei na kiwei pat ki jaitbynriew kiba dang sahdien (OBCs).
Ka jingpynïar ïa ka kynhun Myntri, kaba la sahteng la slem bha, la mynjur hadien ba u President ka BJP, u JP Nadda bad u Nitish, u heh jong ka JD(U), ki la ai ïa ka jingmynjur tang ar sngi shwa ka dorbar mang tyngka jong ka ïingdorbar thawaiñ.
