Imphal, Rymphang:
U Lat ka jylla Manipur, u Ajay Kumar Bhalla, ha ka Sngi Thohdieng u la pynjlan ïa ka por ban aiti ïa ki tiar siat ba la lute bad pyndonkam be-aiñ, haduh ka por 4 baje janmiet jong ka 6 tarik u Lber, hadien ka jingdawa jong ki briew na baroh ar ki jaka lum bad them ban ai por shuh shuh, ong ka kyrwoh khubor.
“Hadien ba la kut ka por ba la buh kaba hynñiew sngi ban aiti ïa ki tiar siat da ka mon sngewbha, ki la don ki jingkyrpad na baroh ar ki jaka them bad lum ban pynjlan ïa ka por. Nga la bishar bniah ïa kine ki jingkyrpad bad nga la rai ban pynjlan ïa ka por haduh ka por 4 janmiet jong ka 6 tarik u Lber,” la ïathuh ka kyrwoh khubor.
Ka la pynthikna shuh shuh ban ym leh kano kano ka jingpynshitom pyrshah ïa kito kiba aiti ïa ki tiar ïaleh jong ki hapoh kane ka por, da kaba pynksan ba “kane ka dei ka kabu kaba khatduh na ka bynta baroh kiba ïadei ban noh synñiang sha ka jingsuk, ka jingïatylli ha ka imlang-sahlang, ka lawei jong ki samla jong ngi, bad ka jingshngaiñ jong ka imlang-sahlang jong ngi.”
U Bhalla u la kyntu ha ka 20 tarik u Rymphang ïa ki kynhun kiba ïaleh thma ban aiti mon sngewbha ïa ki tiar ba la lute na ki bor pahara bad kiwei kiwei ki tiar ba la bat be-aiñ hapoh hynñiew sngi, ha kaba ka por ba la buh ka la kut noh ha ka sngi Palei.
Hapoh ka por ba hynñiew sngi, palat 300 tylli ki tiar siat la aiti noh da ki paidbah, khamtam ha ki jaka them.
Ki la don palat 250 ngut ki briew ki la shah pynïap bad da ki hajar ngut ki la kylla long ki bym don ïing don sem ha ka jingïakynad jaitbynriew hapdeng ki kynhun Meiteis bad ki kynhun Kuki-Zo naduh u bnai Jymmang, 2023.
Ka sorkar pdeng ka la pynjari ïa ka jingsynshar President ha kane ka jylla ha ka 13 tarik u Rymphang hadien ba u Myntri Rangbah ka jylla u N Biren Singh u la iehnoh ïa ka kam.
Ka ïingdorbar jylla kaba don ïa ka por treikam haduh u snem 2027 la buh hapoh ka jingsangeh treikam.
