Shillong, Rymphang 28
Ka Shillong Lajong FC ka la lah ban pynliem ïa ka Langsning FC haduh shiteng dorjon (6-0 kol) na ka bynta ban don ha ka jingïaknieh ïa ka nam lahduh bad ka Mawlai SC ha ka OC Blue Shillong Premier League 2024 ha ka Sngi Thohdieng ha SSA Stadium kaba ha First Ground, Polo.
Kane ka nam jop ka la wan urlong lyngba u Deibormame Tong-per (9′), Samchaphrang Lato (26′), Yohaan Benjamin (30′), Remark Kharmalki (76′), Babysunday Mar-ngar (80′) bad u Mebannangkiew Thabah (90’+2) na ka bynta ban pynlong ïa ka Lajong (39 point) ban ïai bat ïa ka kyrdan ba-ar bad ka dang duna sa tang 2 point ïa ka Mawlai (41 point) kaba dang lamkhmat ha kane ka lympung.
Kane ka long ka sien ba ar ïa ka Lajong ban jop ïa ka Langsning ha kane ka lympung bad ha ka wat kaba nyngkong kaba la long ha Risaw mynshem snem, ka la jop da 4-0 kol.
Da kane ka jingjop ka la pynlong ïa ka Mawlai ba kam pat ïoh suk ban rah ïa ka nam lahduh ha ka sien kaba lai. Te kumta ka donkam ban jop sa lai tylli jingïakhun dangsah bad khamtam ïa ka Nongthymmai SC (ba don ha ka kyrdan na shatrai) ha ka Sngi Saitjaiñ.
Na ka bynta ka Langsning kane ka dei ka jingïakhun kaba khatduh ha kaba ka la mad ïa ka jingshah rem. Te kumta ka la ïai sah ha ka kyrdan ba saw bad kamai 24 point, hynrei ka lah ban shah knieh noh na kane ka kyrdan namar ka Laitkor (23 point) bad ka Nangkiew Irat (22 point) ki dangsah sa ar sien ïakhun.
U Deibormame u la thep ïa ka kol kaba nyngkong hapoh 10 minit na ka bynta ka kol kaba 20 ha kane ka samoi ïalehkai. Une u rangïa-lehkai u la long u rangthep kol ba hakhmat eh ha kane ka lympung.
Hapoh shiteng kynta ka Lajong ka la thep biang ar kol lyngba u Samchaphrang bad u Benjamin na ka bynta ban tam lai kol ha kane ka lympung.
Hadien katto-katne por ba la bteng biang ïa ka jingïakhun jong ka kylla miet, ka Lajong ka la ïai bteng ban ïakhun tyngeh ha kaba u rangapkol kane ka kynhun u Siwel Rymbai u la lah ban kyrda ïa ki ar tylli kabu ksiar ba la pyrshang da ka liang pyrshah ha kaba kawei ka dei lyngba u Mecheal Roy Kurbah hadien ka jingïarap pynbuh bol na u Dauruhipaia Pale.
Hapdeng kane ka jingïakhun ka Lajong ka la lah ban thep biang sa lai kol lyngba u Remark, Babysunday bad u Mebannangkiew na ka bynta ban ïoh jingjop shisyndon.
Ka jingïalehkai ha ka Sngi Saitjaiñ kan long hapdeng ka Nongthymmai pyrshah ïa ka Mawlai ha ka por 3 baje nohphai sngi. Ka Mawlai ka la jop teng da 2-1 kol ïa ka Nongthymmai ha ka wat kaba nyngkong myn ha ka 15 tarik u Kyllalyngkot.
