Jerusalem, Lber:
Uwei u koidi jong ka Palestine uba la shong slem duh ha ki patok jong ka Israel, u Nael Barghouti u la pynlut palat sawphew snem hapoh ka ruh nar, u la ioh ban ïaid laitluid noh ha ka Sngi Palei namar ka jingkylliang koidi ba khatduh eh jong ka jingïasuk kaba shipor hapdeng ka Israel bad ka Hamas.
U Barghouti, u la shong haduh 45 snem hapoh patok, kynthup ïa 34 ngut kiwei koidi ba la pyllait noh da ka Israel hadien ba la kem bad set ia ki da ki phew snem mynshwa.
Kumta, la ong ba u Barghouti u la leit poi ha Egypt ha ka Sngi Palei hadien ba u la shah beh na Palestine tang mar ia lait na ka kti jong ka Israel.
U Barghouti, u la shah kem nyngkong eh ha u snem 1978 bad u la shah rai set patok shi jingim halor ka jingpyn-iap ia u ophisar jong ka Israel bad ka jingdonkti ha katto-katne ki kam thombor ha kylleng ki bynta jong ka Israel.
Ha katei ka por, u Barghouti u long dkhot jong ka Fatah, ka seng jong u President ba mynta jong ka Palestine, u Mahmud Abbas, uba ialeh pyrshah ia ka seng Islamist, ka Hamas.
Ka jingïakylliang ïa ki koidi bad ki koidi kaba la jia ha ka por mynstep jong ka Sngi Palei ka dei kaba hynriew bad kaba khatduh ha ka bynta ba nyngkong jong ka jingïasuk kaba jem hapdeng ka Israel bad ka Hamas. Kane ka jingiateh ka la treikam ha ka 19 tarik u Kyllalyngkot bad ka bynta ba nyngkong jong ka kan kut noh ha ka Sngi Saitjaiñ.
Ka jingsangeh thma ka la pynsangeh shibun eh ïa ki jingïaleh kiba la neh palat 15 bnai kaba la pynjot ne pynjulor kumba palat 69% ki jingtei bad ki iing- ki sem hapoh ka nongbah Gaza. Kane ka thma ka la sakma ïa jan baroh ki nongshong shnong jong ka Gaza bad ka la wanrah ruh ïa ka jingkyrduh bam ha katei ka nongbah baroh kawei.
Hapoh ka bynta ba nyngkong jong ka jing-iakut ban ia pyllait briew markylliang, ka Hamas ka la pyllait ïa ki 25 ngut ki nongshah rahbor kiba dang im jong ka Israel bad kiba don ar tylli ki ri kiba la shah kem ha ka jingshah thombor jong ka ha ka 7 tarik u Risaw jong u snem 2023 bad pynphai biang ïa ki metïap jong 8 ngut kiwei pat. Ka la pyllait ruh ia 8 ngut ki koidi ka Thailand ki bym shym la kynthup hapoh ka jingiateh bad ka Israel.
Ka Israel kum ka jingsiew kylliang la khmih lynti ba kan pyllait ia kumba 1,900 ngut ki koidi jong ka Palestine.
Haba iadei bad kane, la ong ba ia u Barghouti, la pyllait teng shisien mynshwa, kata ha u snem 2011, kum shi bynta ban bujli ia ki koidi Palestine kum ka jingsiew kylliang ia uwei u shipai Israel, uba la shah kem ha ka Hamas. Nangta la set ïa u hapoh ïing ha Kubar, ha West Bank ba la shah kurup noh ha ka Israel.
Hadien kata pat, u la shah kem biang ha u snem 2014 bad u la phet noh na Fatah ban leit pyniasoh bad ka Hamas ha ka por ba u shong patok.
