Shillong, Rymphang 02
U President bad MLA ka Voice of the People Party (VPP), Bah Ardent M. Basaïawmoit ha ka Sngi Thohdieng u la ong ba ki paidbah ka Ri-lum Khasi-Jaiñtia ki la pdiang ïa ki nongrim jong ka seng bad ban jur ba wanrah ïa ka saiñ pyrthei kaba khuid bad suba.
“Ka paw shai ba kum ka seng, ngi sngewkmen shibun eh ban ïohi ba ki paidbah ha ka thaiñ Khasi-Jaiñtia ki la buh jingshaniah ha ngi bad ki pdiang ïa ki nongrim, ki jingmut jingpyrkhat bad ki thup jingngeit jong ngi kum ka seng – ha kaba ngi donkam wanrah ïa ka jait saiñ pyrthei kaba khuid ba suba bad ka synshar-khadar kaba bha,” u la ong.
Halor ka jingong u nongïalam ba ha khliehduh ka NPP bad Myntri Rangbah ka Jylla, u Conrad K. Sangma ba ka bhah ‘vote’ jong ka NPP ka la kiew katba jong ka VPP ka la hiar (haba ïanujor bad ka ilekshon MP), u Bah Basaïawmoit u la ong ba ka jingkheiñ ka paw shai ba ka seng ka dang don hakhmat bad ka jingïoh ‘vote’ ha Ri-lum Khasi ka long 37% katba jong ka NPP, ka long 25%.
“Kata ka mut ba ngi kham hakhmat 12% ban ïa ka NPP. Ha Ri-lum Jaiñtia, ka NPP ka dei kaba ïoh ïa ka bhah ‘vote’ kaba heh tam bad ka tam tang 1% ban ïa ngi. Ki don 32% bad ngi don 31%,” u la ong.
U la ong ruh ba haba ïanujor ïa ka bhah ‘vote’ jong ki seng riewlum, ka VPP ka la ïoh ïa ka bhah ‘vote’ kaba heh tam wat ha kane ka ilekshon.
Haba kdew ba ka seng kam shym la leh bha ha Ri-lum Jaiñtia, u la ong, “Lada dei ba ki paidbah ha Ri-lum Jaiñtia ki ïoh ïa kajuh ka lad kumba ïoh ki paidbah ha Ri-lum Khasi, ngin jin da la knieh wat ïa ka EC ha Ri-lum Jaiñtia.”
Haba kylli la ka bhah ‘vote’ ka la kiew ne em haba nujor bad ka ilekshon MP, u President u la ong, “Ki paidbah kim lah namar kane ka dei ka ‘local election’, kumta ka don ruh ka ‘local factor’. Nalor kine, ki don ruh ki jingbyrngem, ki jingpyntieng ïa ki paidbah ha kaba ym shym la pynlong ïa ka ilekshon kumba pynlong ïa ka ilekshon MP bad MLA.”
Shuh shuh haba bynrap ba ïa ka ilekshon MP bad MLA la pynlong da ka ECI, u la ong, “Kumta phi sngewthuh ïa ki lad ki lynti ba ki bor treikam ka Jylla ki hap ban shim. Hynrei namarba ïa kane ka ilekshon la pynlong da ka Sorkar Jylla, wat la ngi la kdew ïa kita ki jaka thep ‘vote’ kiba don jingma, hynrei ym shym la don kano-kano ka sienjam kaba la shim da ki bor distrik…ym shym la don wat tang uwei ruh u pulit uba la buh ha kine ki jaka thep ‘vote’.”
Nalor kane u la ong ba dei na kata ka daw ba ka seng kam shym la lah ban pynskhem ne lehse ka daw ba ka bhah ‘vote’ ka la hiar ha kane ka ilekshon sha ka District Council.
