Vijayawada, Lber:
Ha ka jingpynbor kaba khraw ban pynkylla ïa ka pule-puthi, ka Sorkar Andhra Pradesh ka la pynbna ïa ka bording khlem jingsiew na ka bynta baroh ki skul sorkar bad ban sdang ïa ka skhim ‘Talliki Vandanam’, kaba ai jingïarap pisa kaba T.15,000 na ka bynta uwei u khynnah skul naduh klass I haduh XII.
Ki jingsdang, ki dei shi bynta jong ka Mang Tyngka 2025-26 ba la wanrah da u Myntri ka tnat pla tyngka u Payyavula Keshav ha Ïingdorbar Thawaiñ ka Jylla, ki thmu ban pynbha ïa ki jinglong jingman ha ka jingpule bad ban kyntiew ïa ka jingpynrung kyrteng. Da ka jingpynlut baroh kaba T. 3.22 lak klur, ka mang tyngka ka pynleit jingmut ha ka pule puthi ha ki skul, ki jingpule kiba kham shalor, ka jingpynroi ïa ki sap ki phong bad ka jingwad bniah, hapoh ka jingïalam jong u Myntri Rangbah ka jylla u Nara Chandrababu Naidu bad u Myntri HRD bad IT N Lokesh. Kawei na ki rai kaba kongsan ka long ban ai bording khlem jingsiew sha kumba 44,000 tylli ki skul sorkar, ban pynduna ïa ka jingeh ha ka liang ka pisa tyngka ha ki bor shnong bad ban pynthikna ïa ka jinglong jingman kaba kham bha ha ka jingpule. U Myntri Lokesh u la khot ïa ka kum ka ‘rai kaba pynkylla dur,’ da kaba pynksan ïa ka bynta jong ka ban pynlong ïa ka Andhra Pradesh kum ka nongïalam ha ka jinghikai skul.
Ka sorkar ka la mang T.9,407 klur na ka bynta ka skhim ai jingïarap Talliki Vandanam, kaba dei ka bynta ba kongsan jong ka jingkular Super Six jong ka sorkar NDA ba la ïalam da ka TDP, kaba la thmu ban pyntreikam ha u snem pule 2025-26.
Da kaba nang pynkhlaiñ shuh shuh ïa ka tnad pule puthi, ka sorkar ka la pynïar shuh shuh ïa ki lad jingïarap jong ka lyngba ka skhim Sarvepalli Radhakrishnan Vidya Mitra. Hapoh kane ka jingthmu, 35.69 lak ngut ki samla pule kin ïoh khlem jingsiew ïa ki Uniform, ki juti, ki kot, bad ki jingbam ba tei met, kiba don ïa u khaw uba bha, kum shi bynta jong ka skhim Dokka Seethamma Mid-Day Meal.
Ka mang tyngka 2025-26 ka la pynkiew shibun ïa ka mang tyngka na ka bynta ka pule puthi, ha kaba ka jingmang pisa baroh ka long T.34,825.61 klur, kaba kiew na ka T.32,722.53 klur ha u snem 2024-25 bad T.30,835.95 klur ha u snem 2023-24. Tang ka jingpule ha ki skul ka la ïoh T. 31,805 klur, kaba kiew da 1,896 klur na kaba la dep. Ïa ka jingpule kaba kham shalor la mang T.2,506 klur, katba T.1,228 klur la mang na ka bynta ban pynroi ïa ki sap bad jinghikai.
Haba kynthoh halor ka jingpynheh ïa ka mang tyngka, u Lokesh u la ong, “Kane ka mang tyngka ka pyni ïa ka jingangnud jong ngi ban pynkhlaiñ ïa ka rukom hikai paidbah. Ka jingpynkiew ïa ka jingai pisa ka pyni ïa ka jingthmu jong ngi na ka bynta ka rukom hikai AP model ha kine ki san snem ban wan.” Ha ka jingthmu ban kyntiew ïa ka jingpynmih thymmai bad ka jingwad bniah, ka sorkar ka la pynbna ban buh ïa ka Ratan Tata Innovation Hub ha Amaravati. Ïa kane ka Hub yn pynïasoh bad san tylli ki Zonal Centre ha kylleng ka jylla, kaba pynleit jingmut ha ki teknoloji kiba dang mih, ki jingsdang, bad ka jingpynroi ïa ki sap ban pynkhreh ïa ki samla pule na ka bynta ki lad ki lynti ha ka pyrthei.
Ka sorkar ka dang trei ban pynthymmai ïa ka jingpule kaba kham shalor da kaba pynïasoh lang ïa ka jingpule ba bun jait, ka jingpule kaba pynshong nongrim ha ka jingwad bniah, ki Library Digital, bad ki Laboratory kiba kham shajrong. Ka jingpyntreikam ïa ka rukom ai Credit ha ki jingpule Polytechnic ruh ka dang ïaid shakhmat. Kum shi bynta jong kine ki jingpyrshang, 83 tylli ki Industrial Training Institute (ITI) jong ka sorkar la kyntiew kyrdan sha ki Skill Hub. Shuh shuh, la tyrwa saw tylli ki ITI ba thymmai na ka bynta ki samla pule ba dang sahdien (BC) hapoh ka Jan Vikas Programme jong u Myntri Rangbahduh ka ri. Ka sorkar jylla ka thmu ban wanrah ïa ka rukom hikai Model ha ka jylla ha kine ki san snem ban wan.
