Shillong, Lber 02
Ka Cricket Lovers ka la long ka lahduh ha ka 4th District League T20 Cricket Tournament 2025 ba la pynïaid da ka East Khasi Hills Cricket Association, hadien ba ka la lah ban pynliem noh ïa ka Sohra Combined da 19 run ha ka Sngi Saitjaiñ.
Ha ka jingïakhun final kaba la long ha madan Saitsohpen kaba ha Sohra, ka Cricket Lovers ka la kam trai ban tied nyngkong ha kaba ka la tied 139 run bad shah pynhap 6 wiket ha ki 20 over. Kane ka la wan urlong lyngba ka jingïalehkai bha da u Rohit Yadav uba la lah ban khyrwit ïa ka shiteng spah kaba 67 run na 56 bol. Katba u Kevin Diengdoh u la shim 3 wiket ha ki 4 over na ka bynta ka Sohra Combined.
Haba wan beh ïa ka thong, ka Sohra Combined ka la tied tang 125 run bad shah pynhap 5 wiket ha ki 20 over. U Pherson Dieng-doh u la tied 35 run na 41 bol. Katba u Mehraf Hussain Sarkar u la shim 2 wiket ha ki 4 over na ka bynta ka Cricket Lovers. Ïa ka nam ‘Player of the Match’ la ïohpdiang da u Rohit Yadav, katba ïa ka nam ‘Player of the Tournament’ la ïohpdiang da u Shavian Blah.
Ha ka sngi pynhap pyrda ïa kane ka lympung la wan ban ïa don lang da u Bah Peter M Kharsawian uba dei dkhot jong ka Apex Council ka Megha-laya Cricket Association bad uba la sam ïa ka khusnam song pisa kaba T.40,000 sha ka Cricket Lovers kum ka lahduh bad T.20,000 sha ka Sohra Combined kaba wan ba-ar.
